Сцыпіё дэль Кампа Ігнацы

Ігнацы Сцыпіё дэль Кампа (1728-1791)   

Дзяржаўны дзеяч Вялікага княства Літоўскага, уладальнік Шчучына.

Нарадзіўся ў 1728 годзе ў сям’і ўладальнікаў Шчучына Юзафа Сцыпіё дэль Кампа і Веранікі з роду Фірлеяў.

Яго настаўнікам быў вядомы гісторык-архівіст і правазнаўца Мацей Догель. У 1745-46 гадах вучыўся за мяжой у Лейпцыгу, наведаў Рым і Парыж.

Па смерці бацькі Ігнацы атрымаў пасаду Лідскага старасты. У 1748 годзе быў першы раз абраны дэпутатам на сойм ад Лідскага павета.

У 1755 годзе пабраўся шлюбам з Марыянай Вадзіцкай.

У 1756 годзе ініцыяваў перанос калегіума піяраў з Воранава ў Ліду.

У 1758 годзе фундаваў будаўніцтва ў Лідзе касцёла святога Юзафа.

У 1759 годзе атрымаў званне генерал-маёра літоўскага войска.

23 мая 1761 года, дзякуючы намаганням Ігнацыя Сцыпіёна, Шчучын атрымаў каралеўскі прывілей на Магдэбургскае права. 

Пад час элекцыі караля ў 1764 годзе аддаў голас за кандыдатуру Станіслава Панятоўскага. 

9 снежня 1765 года быў прызначаны падстоліем літоўскім. 

Прымаў актыўны ўдзел у масонскім руху. Быў братам ложы «Вялікага французкага Усходу», у 1766 годзе ўступіў у шатландскую ложу Брухля.

Фінансаваў выданне «Дыпламатычнага кодэксу» Мацея Догеля.

Кавалер вышэйшых узнагарод Рэчы Паспалітай: Ордэна Святога Станіслава (1776) і Ордэна Белага Арла (1781). 

Памёр у 1791 годзе па дарозе ў Варшаву.