Гінэль Вітольд

Вітольд Гінэль (1918-1969)

Урач-гінеколаг, доктар медыцынскіх навук.

Нарадзіўся 15.06.1918 у вёсцы Зяняпішы (зараз – Шчучынскі раён).

Навучаўся ў Віленскім езуіцкім калегіўме. 

Скончыў двухгадовы курс навучання ў вайсковай школе падхарунжых рэзерву. 

У 1938 годзе паступіў на медыцынскі факультэт Віленскага ўніверсітэта.

З пачаткам Другой усясветнай вайны быў мабілізаваны ў войска, браў удзел у ваенных дзеяннях. Пасля акупацыі Польшчы здолеў перабрацца ў Коўна, дзе працягнуў вучобу на медыцынскім факультэце. Пасля нападу Германіі на СССР вяртаецца ў родныя мясціны.

З 1942 года актыўна супрацоўнічае з падполлем. Трапіў у рукі гестапаўцаў, але здолеў уцячы. Уступіў у першы батальён 77-га пяхотнага палка Арміі Краёвай, які дзейнічаў на Шчучыншчыне. Удзельнічаў у няўдалай спробе апанавання Шчучына польскімі партызанамі ў красавіку і ў бітве за Вільню ў ліпені 1944 года.

Пасля вайны рэпатраваўся ў Польшчу, дзе ў 1948 годзе скончыў медыцынскі факультэт у Познані. 

Пасля службы ў войску ў 1952 годзе быў накіраваны на працу ў Граева, дзе ўзначаліў акушэрска-гінекалагічнае аддзяленне шпіталя. Адначасова цягам 11 гадоў кіраваў мясцовым аддзелам здароўя і сацыяльнай апекі.

У 1962 годзе абараніў доктарскую дысертацыю.

Памёр раптоўна 08.12.1969 на працоўным месцы.

Быў узнагароджаны Крыжам Валечных, Залатым і Срэбным Крыжамі Заслугі.

Імя Вітольда Гінэля з 1993 года носіць Граеўскі шпіталь.