Багамолаў Аляксей

Аляксей Міхайлавіч Багамолаў (1919-2013)

Навуковец-селекцыянер, кандыдат сельскагаспадарчых навук, Заслужаны аграном, Ганаровы грамадзянін Горацкага раёна, Ганаровы прафесар БДСГА.

Нарадзіўся 19.12.1919 у сяле Вялікае Іванаўскае (Маскоўскай вобласць).

У 1938 годзе паступіў у Горацкі сельгасінстытут.

У 1941 годзе трапіў у партызанскі атрад. Пасля злучэння з войскамі Чырвонай Арміі ўдзельнічаў у баях па вызваленні Беларусі і Польшчы, узяцці Кёнігсбергу і Берліна.

У 1945 годзе пасля дэмабілізацыі вярнуўся ў Горкі і працягнуў навучанне. 

У 1948 годзе скончыў сельгасінстытут і быў накіраваны на працу у Беняконьскую сельскагаспадарчую доследную станцыю. У 1953 годзе быў прызначаны дырэктарам станцыі.

У 1956 годзе была створана Гродзенская абласная сельскагаспадарчая доследная станцыя, якая размясцілася ў Шчучыне. Аляксей Міхайлавіч узначальваў яе калектыў ад моманту стварэння.

У 1958 годзе абараніў кандыдацкую дысертацыю.

У 1960 годзе атрымаў званне Заслужанага агранома БССР.

У 1965 годзе ўзначаліў кафедру селекцыі і насенняводства Беларускай дзяржаўнай сельскагаспадарчай акадэміі ў Горках.

У 1982-1995 гадах быў прафесарам кафедры селекцыі і насенняводства.

У 1995 годзе атрымаў званне Ганаровага прафесара БДСГА. 

Аўтар звыш 500 навуковых і публіцыстычных публікацый па агранаміі. 

Узнагароджаны ордэнамі Айчыннай вайны 2-й ступені, Славы 3-й ступені, Працоўнага Чырвонага Сцяга, «Знак Пашаны».

Памёр 02.10.2013 у Горках.