Sunnudagur 14. ágúst 2005 

 Það hefur verið mikið að gera hjá félögum í hestamannafélaginu  Glæsir á Siglufirði, en þeir tóku meðal annars á móti vinum  og félögum frá Ólafsfirði, Fljótum og Hofsósi, eitthvað af öðrum flækingum slæptust með sagði einn félaginn ("og brosti !"). 

Það var og er mikið á dagskrá hjá þeim alla helgina, td. var sameiginlegur reiðtúr í gær, svo leikir og sprell í framhaldi af því. 

 Ég var vitni af sameiginlega reiðtúr þeirra í gær og tók nokkrar myndir sf því tilefni.  Þessi einmanna hestur sem þarna er á myndinni var einn og yfirgefinn innan girðingar og fylgdist með öllu hestastóðinu og knöpum úr fjarlægð. Sennilega hefði hann þegið að vera með í hópnum. Fleiri eru myndir HÉR  

14. ágúst 2005 

Halldór Ásgrímsson forsætisráðherra kom víða við í heimsókn sinni til Siglufjarðar í gær, meðal annars tók hann virkan þátt í gleðinni sem ríkti hjá Síldarminjasafninu, þar sem leikarar Leikfélags Siglufjarðar fóru á kostum að venju. 

Gleði sem var svo smitandi að ráðherrann tók þátt í henni með því að hausskera og salta síldina, þrífa stúlkurnar eftir söltunina og taka svo þátt í dansinum á eftir. 

Þetta uppátæki hans bætti aldeilis á þá ánægju sem fyrir var hjá gestunum sem þarna voru mættir, það má glöggt sjá á þeim myndum sem hér fylgja

Mánudagur 15. ágúst 2005  

Aðsent: 

Þó svo að myndasyrpa sú er ég birti hér, fékk myndirnar sendar frá vini mínum Tryggva Björns, sem auðvitað er Siglfirðingur alveg frá toppi til táar - og einn af uppáhalds leikurum mínu Clint Eastwood kemur þar við sögu, vegna kvikmyndatöku á myndinni FLAGS OUR FATHERS - 

Þá geri ég undantekningu frá reglunni og birti myndir sem ekki tengjast Siglufirði.   Sands of Iwo Jima (1949) sem er mér ógleymanleg frá því að ég sá hetjuna mína John Wayne leika í "fyrri" myndinni þegar ég var unglingur. (en margir  Siglfirðingar dást einnig af Clint) 

Miðvikudagur 17. ágúst 2005   -- Tækni- og umhverfisnefnd - 21. júlí 2005  -- 

Að gefnu tilefni og af  fullri ástæðu, þá var gerð eftirfarandi bókun í tækninefnd...: Nefndin leggur til að farið verði eftir reglugerðinni sem heimilar aðgerðir vegna lausagöngu fjár. ---  Mér leikur forvitni á að vita, loksins eftir að ég fékk tækifæri til að berja "nýjustu" fundargerðir bæjarins augum.  ---- Hverra áhrifa bjuggust nefndarmenn við af ofannefndri bókun ?    ---  Ég spyr í einlægni, þar sem þessar helv... rollutussur, sem tilefni hefur væntanlega verið að bókuninni, eru enn og hafa verið í allt sumar jarmandi og snuðrandi fyrir norðan og neðan svefnherbergisglugga minn. Auk þess sem nágrannar mínir hafa átt í fullu fangi daga og nætur, við að reka frá þeim gróðri og jurtum sem þeir hafa lagt mikla vinnu í að koma upp, fyrir utan eyðileggingu þessara fáu plantna sem komið hefur verið fyrir og dyttað að, af vinnuskólanum í norðurbænum í sumar.  Myndin hér við hliðina er tekin klukkan 08:30 í morgun út um svefnherbergisgluggann minn, þar sem rollur eru að gæða sér í "kálgarðinum" mínum.- og fleiri aðeins norðar 

Fimmtudagur 18. ágúst 2005 

Ein gömul:  

Horfin fjárhús, (en rollurnar leika þó enn lausum hala)

Þessi fjárhús voru staðsett ofan við Háveg, þar til snjóflóð tók húsin 14. febrúar 1971 

Fimmtudagur 18. ágúst 2005  

Ég var beðinn að taka mynd af þessum fugli - og spurður í leiðinni hvort ég vissi hvaða fugl þetta væri. Þegar mig bar að garði var fuglinn all nokkuð fjarri, svo myndin er ekki eins góð og æskilegt væri til að bera kennsl á hann, en farið var að bregða birtu í gærkveldi er myndin var tekin. - Ekki svo að skilja að ég sé nokkur fugla spekingur, þar eð þekking mín á fuglum takmarkast við kríuna (þe. útlitið) Þetta er þó nokkuð líkt kollu, en grái liturinn á bakinu og undir vængjunum ruglar mig. 

Vaknið þið spekingar og látið okkur vita um þetta "afbrigði"  ----  Svar: Að öllum líkindum er þetta æðarfugl og nánar til tekið bliki. Blikarnir geta tekið á sig ýmsar litmyndir bæði á fjaðrafellitíma síðsumars og þegar unglingar færast í ham fullorðins blika. Kveðja - Örlygur Kristfinnsson 

Fimmtudagur 18. ágúst 2005 

Um 30 húsbílar komu í bæinn í gær með stuttu millibili og kom sér fyrir á tjaldstæðinu við Torgið. Flestir bílarnir eru frá Svíþjóð og Noregi og tilheyra húsbílaklúbbum þar í löndum og eru á hringferð um landið. 

Hingað komu þeir þrátt fyrir að þurfa að aka hluta leiðarinnar til baka (Héðinsfjarðargöng eru ekki komin !) 

En Síldarminjasafnið, það hefur aðdráttarafl sem og fjörðurinn okkar Siglufjörður. 

Fimmtudagur 18. ágúst 2005  

Aðsent:  Þessa mynd fékk ég senda í morgun frá tveim aðskildum aðilum og læt ég báða textana fylgja til gamans: 

Í gær áttust við landslið Íslands og Suður Afríku á Laugardalsvelli. Leiknum lauk með 4-1 sigri okkar Íslendinga. Grétar Rafn Steinsson (sonur Laugu og Elmars) var í byrjunarliði Íslands og skoraði fyrsta mark leiksins og kom þar með Íslendingum yfir 1-0.

Á myndinni má sjá Grétar ásamt Árna Heiðari eftir leik. AÞM   --- Og hinn textinn:

Hér er mynd af tveim þekktum Siglfirðingum, rétt er að geta þess að annar þeirra skoraði fyrsta markið gegn Suður-Afríku í gær þegar Ísland sigraði Suður-Afríku 4-1. Spurningin er hvor þeirra? 

Kveðja, Siggi Helga.   (ljósmyndari, líklega Andri Janusson. ?) 

Fimmtudagur 18. ágúst 2005 

Félag Eldri borgara á Siglufirði og í Fljótum. 

Á milli 30-40 eldri borgarar héldu af stað í morgun áleiðis í fjögurra daga öræfaferð. 

Föstudagur  19. ágúst 2005  

Hún Hrönn Einarsdóttir, vinkona mín hefur unnið á Sveitahóteli í sumar, hún sendi mér þessa kveðju og mynd, jafnframt til að lofa öðrum að vita: 

Þessari dvöl í sveitinni er lokið og hún er kominn heim:

Þessa mynd er tekinn fyrir ofan Stóru Giljá í húnavallarsýslu. 

Laugardagur 20. ágúst 2005  

Sendi þér nokkrar myndir sem ég tók í gær þegar ég fór til Grímseyjar með Fokker flugvél FÍ. Flugstjórinn gerði það fyrir okkur að fljúga svona út Eyjafjörðinn svo við gætum séð "firðina okkar" úr lofti. ---   

Á myndunum má sjá meðal annars. Ólafsfjörð, Hvanndali, Héðinsfjörð, og að sjálfsögðu Siglufjörð, svo og Grímsey. -- 

Einnig myndir teknar úr Grímsey af fjöllunum okkar, þarna má sjá Ólafsfjörð, Héðinsfjörð og Siglufjörð í sömu myndinni. - 

Þarna sá ég m.a. til framkvæmda Stefáns á Nesi í Héðinsfirði, sem glöggir geta kannski séð, rétt innan við vatnið. Tilefni ferðarinnar var að fagna endurbyggingu flugvallarins í Grímsey. --- Sendi " Lífinu á Sigló " þessar myndir svo fleiri megi njóta þeirra. ---  Kær kveðja Kristján L Möller      

Laugardagur 20. ágúst 2005  

Á heimleið -- 

Óskar Berg sendi mér þessa mynd í gærkveldi, en hann smellti á þau hjónin Sturlaug Kristjánsson og Fanney Hafliðadóttur sem voru á heimleið eftir kvöldkaffi, í blíðunni um klukkan 23:30 á vespunni sinni. 

Laugardagur 20. ágúst 2005  

Nýtt á "Lífið á Sigló" Ég hefi að undanförnu átt í basli með tengingu á upplýsingum frá Veðurstöðinni í Bakka beint út á netið, en ég hefi þurft til þessa, að gera þetta handvirkt. 

En nú hefi ég með aðstoð góðs vinar bætt úr þessu, og geta nú þeir sem vilja huga að veðrinu heima á Sigló, smellt á tengilinn.  

Tengil sem einnig er staðsettur  efstur á meðal annarra tengla hér efst á blaðsíðunni -og þá koma fram nýjar veðurlýsingar sem uppfærðar eru á 10 mínútna fresti --- Það ber þó að athuga, að eftir er að íslenska textann vegna upplýsingana, en það kemur síðar.