Lífið 26.-31. ágúst 2003

26. ágúst, 2003

Þessi regnbogi lét sjá sig kl. 15:34 í gærdag 

26. ágúst. 2003

Malbikun hélt áfram á fullu í morgun á Gránugötunni, þrátt fyrir rigningarsudda. 

Aðilar frá Akureyri sjá um verkið og keyra efninu þaðan. 

Nokkuð margar ferðir þungra bifreiða með malbikunarefnið, sem keyrt er um Lágheiði, hefur leikið veginn þar nokkuð illa. 

Haft er fyrir satt að um þessar mundir sé vegurinn um Lágheiði vart fær fólksbifreiðum, af þessum völdum. 

27. ágúst --2003 

Vel gengur við bryggjusmíðina sem verið er að vinna við framan við Síldarminjasafnið 

27. ágúst - 2003

Rækjutogarinn Askur kom í gær með um 130 tonn af frosinni rækju eftir vel heppnaða veiðiferð, sem verið er að skipa upp í dag.

 Rækjan fer til vinnslu hjá Pólar 

27. ágúst 2003

Hrefnuveiðibáturinn Halldór Sigurðsson kom til Siglufjarðar í gærkveldi um 11 leitið, með hrefnu. Þeir náðu henni rétt utan við fjörðinn, gerðu að henni hér úti á firði, komu fyrir í körum, sem síðan verða flutt héðan "suður" með flutningabíl. 

Eysteinn Aðalsteinsson fisksali, var spurður um hvort við Siglfirðingar mundum ekki fá að smakka á þessu góðgæti. 

Hann svaraði; að það væri ekki hlaupið að því að fá þessa afurð, þar sem fyrst þyrfti að flytja hana suður til einkasöluaðila, og síðan aftur norður, og þá væri tæpt að sú fyrirhöfn skilaði nokkrum arði. 

Rækjubáturinn á við smávegis bilun í vélbúnaði, sem Guðmundur Lárusson frá Rafbæ er að vinna í, en að því loknu mun báturinn halda á veiðar á ný. 

8. ágúst  2003

Arnar Heimir garðyrkjufræðingur er um þessar mundir að vinna við að gera svæðið vestan við Skálahlíð snyrtilegt og aðgengilegra fyrir eldra fólkið, með því að helluleggja og garðskreyta

28. ágúst 2003

Malbikunarframkvæmdum við Tjarnargötu, Gránugötu og lóð Skeljungs er lokið og umferð hefur verið hleypt á svæðin. 

Eftir er ýmis frágangsvinna, við gangstéttir og fleira smávegis. 

29. ágúst 2003 

Nýlega voru opnuð tilboð í uppsetningu stoðvirkja, vegna snjóflóðavarna á Siglufirði, það er í Gróuskarðshnjúk, (aldrei heyrt þetta nafn fyrr) á svæði sem oftast er kölluð Hvanneyrarhlíð, ofanverð, norðan Hvanneyrarár, á svæðinu uppi, nálægt þar sem Lúpínan hefur breytt úr sér.

Alls buðu 6 fyrirtæki í verkið, þar á meðal SR-Vélaverkstæði hf. sem átti næst lægsta tilboðið, sem svarar tæplega 71% af kostnaðaráætlun.

Íslenskir aðalverktakar, buðu lægst, þ.e. tæplega 58% af kostnaðaráætlun. Hæsta tilboðið kom frá Ræktunarsambandi flóa og skeiða, 277% yfir kostnaðaráætlun. Nefnd stoðvirki, er að svipaðri gerð og efsti hluti þeirra sem fyrir eru nokkru sunnar, og sett voru upp fyrir 2-3 árum. Gert er ráð fyrir að verkinu verði lokið fyrir 1. október 2004

30. ágúst 2003

70 tonna jarðýta, kom yfir Siglufjarðarskarð í morgun, ekki vegna hins fagra útsýnis sem þar er oft, heldur vegna þess að ekki var hægt að koma henni í gegn um Strákagöng vegna stærðar. Flutningavagn flutti ýtuna að veginum að Siglufjarðarskarði vestanverðu, og tók síðan við henni Siglufjarðarmegin, þegar ýtan var komin niður að austan. 

Ekki þó sami vagn, heldur annar, en sá fyrri brotnaði, er verið var að keyra ýtuna af vagninum vestan við Skarðið. Ekki var það vegna þungans, sem sameiginlega var yfir 80 tonn, þrátt fyrir að ýtan hafði enga tönn, og annað sem tekið hafði verið af henni til að létta hana fyrir flutninginn. 

Hroll setti að mönnum vegna brotna vagnsins, og var hugsað til þess, hefði hann brostið úti á þjóðvegi í beygju og hliðarhalla. þá hefði farartækið oltið með öllu sem því fylgdi, með ófyrirséðum afleiðingum. 

31. ágúst 2003

"Engar fréttir eru góðar fréttir" segir máltækið, en á morgun rúnti mínum fann ég ekkert markvert. 

Mánafoss var jú að losa og lesta gáma eins hann gerir um hverja helgi. 

Það var rigningarsuddi aldrei þessu vant, en hlýtt og milt veður