Þriðjudagur 9. nóvember 2004  Þeir eru enn við sama heygarðshornið framsóknarmenn í Skagafirði í dag, eins og mergur þeirra var fyrir 70 árum þegar þeir gerðu allt hvað þeir gátu til að gera Siglfirðingum lífið leitt á uppgangi síldaráranna, þegar Siglufjörður og önnur síldveiðiþorp og bæir "stálu" frá bændum í Skagafirði leiguliðunum sem lifðu fyrir náð bændanna sem hálfgerðir þrælar, en gátu loks frjálsu höfði strokið með því að fara til vinnu fyrir launum í beinhörðum peningum á Sigló og fleiri síldarstaða það er ekki launum greitt með fæði og húsaskjóli ásamt smáaurum skammtað til annarra nauðsynja. Og enn reyna þeir að hafa áhrif á tilveru okkar 

Siglfirðinga, ef marka má ályktun Kjördæmisþing Framsóknarflokksins í Norðvesturkjördæmi sem beinir eindregnum tilmælum til Alþingis að fresta gerð Héðinsfjarðarganga milli Ólafsfjarðar og Siglufjarðar.  

Lesið nánar hér á fréttavef Vísir.is 

Fimmtudagur 11. nóvember 2004  Nú á síðustu dagur rignt yfir okkur netverja úr öllum áttum, einskonar keðjubréf þar sem fólk er kvatt til framsenda- og að versla ekki við olíufélögin, nema BENSÍN. 

Það er hvatt er til að hunsa öll önnur viðskipti við olíuþjónustur, og hvað Siglufjörð varðar; Bensínstöðina og Olísverslunina. 

Ég framsendi ekkert af þeim fjórum póstum sem ég fékk með þessu efni. 

Málið er einfalt: Ef við Siglfirðingar förum eftir þessu rugli, þá erum við að herja meira á saklausa umboðsaðila hér á Siglufirði en olíufélögin sjálf eða forkólfana- og skerðum með því hluta af þeim tekjum sem þær fjölskyldur hér hafa sem lífsviðurværi af þessari þjónustu. 

TAKIÐ EKKI ÞÁTT Í ÞESSU RÁÐABRUGGI, á Siglufirði amk. Vissulega ber að fordæma þann þjófnað sem forkólfarnir hafa viðurkennt og beðist afsökunar á að hafa framkvæmt. Látum dómstólana um að hegna þeim, og vonum að dómarnir verði í samræmi við þann 5 mánaða fangelsisdóm sem einstaklingur fékk á dögunum, fyrir að stela bensíni fyrir um 400 þúsund krónur með krítarkorti. Það er varla hægt að fara fram á vægari dóm, þótt hvítflibbar eigi í hlut. 

Fimmtudagur 11. nóvember 2004 

Bæjarstjórn Ólafsfjarðar harmar afstöðu framsóknarmanna.

Á fundi bæjarstjórnar Ólafsfjarðar sem haldinn var þriðjudaginn 9. nóvember var eftirfarandi ályktun samþykkt: ”Bæjarstjórn Ólafsfjarðar harmar ályktun kjördæmisþings framsóknarmanna í Norðvesturkjördæmi, haldið í Borgarnesi um nýliðna helgi, þar sem kveðið er á um frestun jarðganga, um Héðinsfjörð til Siglufjarðar.  -- Bæjarstjórn Ólafsfjarðar hvetur framsóknarmenn í Norðvesturkjördæmi, sem og aðra þá er kunna að vera í vafa um gildi þessarar framkvæmdar til að kynna sér samfélagslegt gildi jarðganga fyrir byggðarlögin við utanverðan Eyjafjörð, sem og Eyjafjörð allan”. ---  Tekið af vef Ólafsfjarðar, sem er vel við haldið með nýjum fréttum af störfum bæjarstjórnar. 

Föstudagur 12. nóvember 2004   -- Dapurlegt:    Norðlenskar fréttir Svæðisútvarpsins þ.11.11:

Ólafsfirðingar hafa hlutfallslega minnsta trú á framtíð eigin byggðarlags á næstu árum, en Grímseyingar eru jákvæðastir. Þetta kemur fram í könnun Rannsóknastofnunar Háskólans á Akureyri, sem kynnt var í dag. 40 % Ólafsfirðinga segjast hafa trúa á þróun bæjarins og næst þar fyrir ofan eru íbúar Dalvíkurbyggðar, þar er hlutfallið 58 % Allir íbúar Grímseyjar, eða 100 % segjast hafa trú á jákvæðri þróun byggðarlagsins. Á Akureyri segjast 81 % hafa trú á þróuninni. Um fjórðungur íbúa Siglufjarðar, Dalvíkur og Ólafsfjarðar telur frekar líklegt að flytja burt á næstu tveimur til þremur árum, en 16 % prósent Akureyringa. Grímseyingar eru hins vegar ekki á þeim buxunum að flytja, því enginn virðist vera í þeim hugleiðingum.