Mánudagur 4. október 2004  Talsvert fjör er í ánum okkar; Leyningsá og Hólsá. Fossinn inni í Skógræktinni er hressilegur, þó hann sé ekki í sama vexti nú þann 21. september síðastliðinn.  En það má kalla lán að þeim tókst að fylla mótin á föstudaginn vegna nýju brúarinnar yfir Fjarðará, því annars má búast við að mótin hefðu aflagast all verulega, þar sem áin er nær búin að grafa undan stuðnings klossunum og mótið umflotið. Myndirnar voru teknar um kl.10:30 í morgun.   En það má kalla lán að þeim tókst að fylla mótin á föstudaginn vegna nýju brúarinnar yfir Fjarðará, því annars má búast við að mótin hefðu aflagast all verulega, þar sem áin er nær búin að grafa undan stuðnings klossunum og mótið umflotið. Myndirnar hér fyrir neðan voru teknar um kl.10:30 í morgun. 

Fimmtudagur 7. október 2004  -   Baltasar Kormákur er kominn hingað til Sigló með aragrúa liðs, vegna töku á atriðum í kvikmynd sína "Smá ferð til himna" 

En hingað kom hann seinnipartinn í gær ásamt leikurum, áhættuleikurum og öðru starfsliði. Einnig komu nokkrir amerískir "kaggar" sem verða flestir klessukeyrðir að mér var sagt, meðal annars  inni í Strákagöngum og kveikt verður í einhverjum þeirra. Tökur hófust seint í gærkveldi og í nótt. 

Auglýst hefur verið í útvarpi að vænta megi tafa við göngin næstu daga. Myndin til vinstri er af nokkrum bílanna (kagganna) vestan við göngin, en þetta eru amerískir bílar, fluttir inn sérstaklega í þeim tilgangi að klessukeyra þá. Þeir voru fluttir hingað á stórum flutningabílum þar sem þeir eru ekki skráðir sem ökutæki. Hin myndin sýnir hvar kvikmyndagerðar-gengið hefur komið sér fyrir úti á Strönd, þar sem bækistöðvar þeirra eru, 4 eða 5 húsvagnar og fleiri vagnar af ýmsum tegundum og gerðum. 

Föstudagur 8. október 2004  Brúin yfir Hólsá. 

Nú er lokaáfanginn að nálgast við smíði brúarinnar. Búið er að setja járnbita á milli stólpanna, sem er undirstaða steypumótsins sem en sjálft brúargólfið verður steinsteypt plata,- og þegar steypan hefur þornað verða bitarnir fjarlægðir. Myndin til hægri hér fyrir neðan sýnir tvo af starfsmönnum Mikael e.h.f. sem er með verkið og svæðið eins og það leit út klukkan 10 í morgun, en þetta eru Björn Þorbergsson og Ingimar Björnsson 

Laugardagurinn 9. október 2004     Aðsent:  

Eins og lesendum vefsins er kunnugt, þá er Baltasar Kormákur með mikið lið og búnað hér vegna töku á kvikmynd sinni "Smáferð til himna" 

Einn af aðalleikurum myndarinnar, hinn viðfeldni og vinsæli Forest Whitaker var á ferðinni seinnipartinn í gær til að skoða bæinn okkar Siglufjörð, hann kom meðal annars við í versluninni Videoval.   þessar myndir voru teknar fyrir utan, en á annarri þeirra er Forest Whitaker og Þorsteinn Sveinsson sem rekur Videoval ásamt konu sinni Fanney Margrétardóttir.  En á hinni er Whitaker og Sveinn Þorsteinsson. 

Lífið: 1.-10. Október 2004‎ > ‎

Álalækurinn 1920

Grein úr blaðinu Fram, frá 19. júní 1920  (beint eftir haft frá blaðinu)

 Eins og flestum bæjarbúum er kunnugt eru hér ekki færri en 15 fastar nefndir sem allar eru sérstaklega skírða til þeirrar skyldu, - sumar jafnvel að miklu leyti sjálfar kosið sig til þess að hafa framkvæmdastjórn á hinum ýmsu opinberu störfum fyrir bæinn og yfir höfuð að vaka yfir þroska hans og sóma á öllum sviðum.

 Ein af þessum velæruverðugu nefndum er heilbrigðisnefndin, en með því að hún sem slík á að gæta alls þess, er varðar þrifnað bæjarins og heilbrigði, beini ég hér með sérstaklega til hennar, og því næst allra bæjarbúa, þeirri fyrirspurn hvort það sé hættu eða vansalaust að hreinsa ekki Álalækinn, minnsta kosti á hverju vori á meðan hann er látinn renna opinn í gegn um bæinn.

 Það er ætíð óviðfelldið að sjá slíkt liggja ofanjarðar - og það þó fjær sé - sem menn daglega sjá nú af aðalgötu bæjarins liggja í Álalæknum; að öðru leyti vil ég helst komast hjá því að gefa nákvæma lýsingu á þeirri viðurstyggð, sem nefndur lækur er fyrir bæinn, eins og hann lítur út, enda öllum augljóst og vitanlegt. 

 Hvað snertir hina heilbrigðislegu hættu af því að hafa lækinn óhreinsaðan vil ég benda á það, að ég hefi orðið þess var, að börn eru oft að sulla í læknum (ef til vill drekka úr honum) og þar á meðal að veiða upp úr honum ýmsan gamlan óþverra, sem vel getur verið þeim og öðrum skaðlegur, auk þess mun það eiga sér stað, að fólk fari með mat og matarílát í lækinn.

 Annars virðist mér það, hvernig sem á er litið mjög óhyggilegt auk óþrifnaðarins að láta lækinn renna suður í gegn um bæinn í stað þess að gjöra honum farveg annað hvort út og niður í Hvanneyrarkrók, sem ef til vill væri það besta, eða þá beint niður frá hliðinu á Hvanneyrargirðingunni niður í tjörnina fyrir neðan Kamb og úr henni með röri í gegnum malarkambinn.

 Haldi lækurinn þeim farvegi, sem hann hefir nú, hefur það þær afleiðingar meðal annars að óumflýjanlegt er að kosta æði miklu fé til þess að tryggja allan veginn með fram honum, sérstaklega Hvanneyrarbrautina, sem hann er nú á góðum vegi með að eyðileggja.

 Í  öðru lagi verður ekki hjá því komist að hreinsa farveginn á hverju ári og helst dýpka hann nokkuð.

 Í þriðja lagi verður lágeyrin að utan (mýrin) aldrei vel þurrkuð upp á meðan lækurinn rennur suður fyrir ofan hana.

 Í fjórða lagi verður það ekki fyrirbyggt - sem getur verið mikið peningaspursmál - að lækurinn, þó straumlítill sé hér neðra, beri æði mikið fram og skemmi með því bestu bryggjustæðin.  Eru grynningarnar fram af honum ljósastur vottur um það.

Að leiða lækinn ofan frá hliðinu kostar mjög lítið, þegar þess er gætt að skurð eða lokræsi gegn um hávaðann sunnan við Kamb ofan í áðurnefnda tjörn þarf að gjöra hvort sem er til þess að þurrka upp mýrina.

 Sé það ekki ákveðið enn hvar Álalækurinn á að falla til sjávar í framtíðinni, er þegar kominn tími til að gjöra út um það, og hefði það helst átt að gjörast áður en byrjað var á braut þeirri, sem nú er verið að leggja meðfram læknum.

 Vildi ég svo mega mælast til þess við heilbrigðis og sóttvarnarnefndina að þær bæru ráð sín saman og athuguðu hvort ekki mætti komast af með mykjuhauginn sem bæjarprýði þá lækurinn væri hreins­aður, settur í lokaðan farveg eða breytt um stefnu hans?

 S v. B.