Lífið 1. - 7. sept. 2003

1. september 17:30 - Þeir sögðu nei -- og oft nei, við beiðninni til "Vegagerðarinnar" um að taka litla spölinn sem eftir var, og klára jarðvegsskipti og malbikun Gránugötunnar, þrátt fyrir að fleiri en einn hafi bent á hagkvæmni þess að vinna verkið strax, sem þurfti hvort að er að vinn. Nei, nei, nei. En svo kom maður að sunnan frá vegagerðinni, til að taka út nýafstaðið malbikunarverk og sá dæmið eins og heimamenn höfðu séð það. Eitt símtal frá honum dugði og fékk því framgengt að farið var í að klára dæmið að fullu. Myndirnar sýna gröfuna á fullu, stjórnandi hans er Kári Hreinsson 

2. september 2003

Nú lítur út fyrir, að kosningaloforðin varðandi Héðinsfjarðargöng hafi ekki verið venjuleg kosningarsvik ríkisstjórnarinnar, heldur einnig pólitískt klúður og bruðl á fjármunum til einskis. Þetta má lesa út úr fréttum fjölmiðlana um þá lögleysu, til viðbótar svikunum sjálfum, varðandi Héðinsfjarðargöng.

Spurningar hafa vaknað í fjölmiðlum, hvort Sturla ætti ekki að víkja úr embætti sínu sem ráðherra, þar sem í ljós hefur komið að hann hefur brotið lög.

Allstaðar annarstaðar í lýðræðisríki hefði það skeð, en við erum í hálfgerðu banalýðveldi, svo það er ekki talin ástæða til þess? Svo er það spurningin, hvort aumingja Sturla sé ekki bara hamar og sigð í höndum Davíðs.

Einn ráðherrann lýsti því jú yfir í Bíósalnum forðum að það væri Davíð sem tæki allar ákvarðanir, hinir ráðherrarnir verði bara að hlýða, ef þeir vildu halda stólunum.

Vonandi bera þessir svokölluð ráðherrar, að keisaranum Davíð meðtöldum, gæfu til að semja við verktakann um að hefja strax verkið, frekar en að henda hundruðum miljónum króna í málskostnað og tapað mál.

3. september. 2003

Byrjað er á að flytja inn á grunn Bátahússins litlu bátana, Sigurvin, snurpu-nótabáta ofl. Stærri bátarnir voru komnir áður. 

3. september. 2003    Ég hefi undanfarna mánuði, verið að vinna gögn úr gömlum Siglufjarðarblöðum (sem sumum mun vera kunnugt) Oft hefi ég rekist á athygli verðar fréttir og greinar, sem fróðlegt og gaman hefur verið að lesa. En í morgun rakst ég á eina mjög athygli verða grein, sem ég get ekki stillt mig um að benda á hér, í ljósi síðustu umræðna um hnífstungu þá, er ríkisstjórnin rak í bak Sjálfstæðismanna hér í bæ..

En árið 1939 var Ólafur Thors, atvinnumálaráðherra, og Siglfirðingum fannst þá að Sjálfstæðismenn í ríkisstjórn hefðu ekki staðið við gefin loforð, sem þó voru ekki nærri því eins greinileg og nú varðandi Héðinsfjarðargöng.

Hér fer "niðurlag" greinar í Siglfirðing 3. október 1939

"Sjálfstæðismenn hér urðu fyrir sárum vonbrigðum, og þeim mestum er fremst höfðu staðið í baráttunni, er þeir sáu, að jafnvel þeirra traustustu menn brugðust þeim hrapalega, þegar mest á reyndi í þessu máli. Þess vegna hafa tveir þessara manna lagt niður umboð sitt sem fulltrúar flokksins í bæjarstjórn, og þess vegna hafa allir formenn sjálfstæðisfélaganna hér sagt af sér.

Það eru mótmæli frá þeirra hálfu gegn því, að þeim fannst sem verið hafi vegið að baki þeim, og sá veitt þeim mestan áverkann er stærstan gat fyrir þá borið skjöldinn."

4. september 2003

Aldrei skeð í manna minnum (?) fyrr, að allur snjór og klaki hafi allur bráðnað í vesturfjöllunum við Siglufjörð. Svo má einnig segja um allan fjallahringinn, nánast allur snjór eða öllu heldur klaki, er horfinn, einstaka smáblettir innst í skorningum í suður fjöllunum. Hlíðin fyrir ofan Skollaskál, hefur að geyma einn lítinn klakablett, ennþá, en svo lítinn að hann sést ekki án sjónauka. 

5. september 2003   -- Á Álfhól, í Siglufirði, er að finna þessi tvö "skilti" á stalli. (myndir hér neðar) Annað er útsýnisskífa, sem ber kenni og nöfn helstu örnefna á fjallahringnum í kringum Siglufjörð, hitt segir munnmælasögu um tilkomu hólsins sem útsýnisskífan er á. Varðandi þessa útsýnisskífu, sem ég heimsótti í gær, eftir að mig minnir um áratug .

Þetta var mjög gott framtak þeirra, sem ég veit ekki hverjir voru, er gáfu þennan stall með skífunni. Skífan hefur eflaust veitt mörgum ánægju, við að skoða fjallahringinn og finna nöfnin sem skífan bendir til. En í dag (gær) gerir hún ákaflega takmarkað gagn, þeim sem á annað borð treysta sér til að nálgast hana.

Ég átti fullt í fangi með að komast að henni, og "kalla ég ekki allt ömmu mína" eins og máltækið segir.

Enginn sjáanlegur stígur sést þarna vegn hávaxins gróðurs, ef stígur er/væri þarna á annað borð fyrir hendi?

Djúpur skurður er á leiðinn meðfram flugbrautarvegi, sem sést ekki vegna áðurnefnds gróðurs, nema sérstaklega sé að hugað, og raunar fyrirfram vitað af honum, og er því stórhættulegt að hoppa yfir hann þar sem í hvorugan barminn sést fyrir gróðrinum. Hvað varðar skífuna sjálfa, þá segir myndin sína sögu um gagnsemina, aðeins er hægt að lesa brot af því sem þar stendur, vegna fugladrits og tæringar.

Ef einhver er ábyrgur fyrir þessu máli, ætti hann að drífa sig til að gera eitthvað í málinu, útbúa sjáanlegan göngustíg, og taka með sér góðan hreinsivökva og slípimottu.