27. apríl 2004  Svar óskast !  Á fundi utanríkisráðherra á Kaffi Torg í janúar síðastliðnum, var Halldór Ásgrímsson spurður um framkvæmdir vegna brúar yfir Hólsána í tengslum við marglofuð jarðgöng. Svar hans var afdráttarlaust. "Það verður byrjað á þessum framkvæmdum í sumar hvað sem hver segir." (nærri því orðrétt)  Og í sama streng tók sjávarútvegsmálaráðherra nokkrum dögum síðar á fundi á sama stað: Það verður hafist handa í sumar hvað sem tautar.

Nú hefur Vegagerðin auglýst eftir tilboðum í hin ýmsu verk sem framkvæma á í sumar, hvergi fann ég á heimasíðu Vegagerðarinnar nokkurn stafkrók um brúarsmíði á Siglufirði. Því spyr ég: Verður byrjað seinnihlutann í sumar að reka niður hæla eða eitthvað því um líkt- og svo restinni frestað til næstu ára???? 

28. apríl 2004  

Undirritaður hefi undanfarin ár mjög mikið notað  upplýsingar frá þjóðskrá, sem boðið hefur verið uppá í gegn um bankana, þessar upplýsingar nota ég vegna skráninga á myndasafni mínu í þeim tilgangi að hafa þær upplýsingar sem réttastar. 

Nú er svo komið að kreddufólk úr ýmsum áttum telja þessar upplýsingar heilagar í nafni persónuverndar.  

Á vef KB banka er þessi orðsending: "Þjóðskrá lokað 1. maí 2004". 

Ágæti notandi þjóðskrár. Við vekjum athygli á því að frá og með 1. maí nk. verður, samkvæmt ákvörðun Hagstofu Íslands, óheimilt að veita aðgang að þjóðskrá á opnum vef líkt og KB banki hefur boðið upp á undanfarin ár. Við vekjum athygli á því að Hagstofan veitir upplýsingar úr þjóðskrá í síma 569 2950.

" Ég hringdi í þetta símanúmer til að afla frekari upplýsinga. Þá kom í ljós að þetta er gert af kröfu Persónuverndar  - en............., - ef ég borgaði 40.000 krónur, þá væri þetta ekkert leyndarmál.  Þetta kallast líklega persónuvernd, nema þú eigir peninga. 

Þetta eru að mínu mati ekki "vinargreiði" "þjónustugreiði"- heldur dulbúnar mútur. Þeir eru sem sé að SELJA upplýsingarnar sem þeir hafa safnað um okkur.
Þetta er okkar gagnabanki og á að vera öllum frjálst að skoða og fara eftir þeim reglum sem koma í veg fyrir misnotkun. Hvað verður næst, ætla þessir andskotar.... að loka símaskránni einnig?  Steingrímur. 

28. apríl 2004   Svar "komið"  Vegna fyrirspurnar og vangavelta um brúna yfir Hólsá (hér ofar á síðunni 27/4) - sem ráðherrar fullyrtu að yrði byggð í sumar. Þá hefur borist óstaðfest svar um að þar sem verkið sé ekki á vegaáætlun hafi það þess vegna ekki verið  boðið út á hefðbundinn hátt með öðrum verkum. En brúarsmíðin verður boðin út í næsta mánuði og framkvæmdir ættu að hefjast fljótlega úr því. Við skulum vona að svo verði.