Sunnudagur 16. janúar 2005 --  Í gærdag var Björgunarsveitin Strákar send af stað til að leita 5 manna sem sagt var að hefðu farið á vélsleðum frá Siglufirði áleiðis til Héðinsfjarðar en höfðu ekki látið í sér heyra. Sagt var að þeir hefðu farið til þess að smala saman rollum sem sést hefði til, og koma þeim niður að vatni í Héðinsfirði, þar sem bátur kæmi á móti og tæki við rollunum. 

Sleðamenn Björgunarsveitarinnar kunnir staðháttum lögðu af stað með tilheyrandi búnað til leitar. Fljótlega munu þeir hafa fundið einn af félögunum. Sá sem fannst, hafði orðið viðskila við hópinn, festi sleðann sem hann var á og týndi síðan sleðanum, Þ.e. skyggni var mjög lítið sem ekkert. Og þar fyrir utan varhugavert sleðafæri. Snjótroðari sem var með í för leitarmanna kom með manninn til byggða. Síðar náði hópurinn sem saknað var, sambandi úr Björgunarskýli Slysavarnafélagsins í Héðinsfirði og lét vita af sér, en einn þeirra félaga mun hafa farið fram af hengju og meiðst á fæti.  Að öðru leiti var allt í lagi með þá. - Þegar þetta er skrifað, seint í gærkveldi, var Sigurvin, björgunarsveitarbáturinn lagður af stað til að sækja mennina.  --  Það skal tekið fram að þessi frétt hefur ekki fengist staðfest í aðalatriðum, þrátt fyrir að þess hafi sérstaklega verið óskað og raunar fengið loforð um frekari fréttir hjá stjórnstöð Björgunarsveitarinnar þegar mennirnir væru fundnir. En fréttin er soðin saman úr 11 tölvupóstum og símtölum til mín frá ýmsum góðkunningjum, nöfn þeirra týndu voru þar einnig, en ég sleppi þeim hér. Það hefði þó verið betra að fá þessar upplýsingar frá Björgunarsveitinni sjálfri.  --  VIÐBÓT vegna gagnrýni við þessa frétt, er neðst á þessari síðu

Mánudagur 17. janúar 2005  Aðsent: 

Ábending til foreldra og forráðamanna barna sem renna sér niður úr Siglufjarðarskarði."  Við viljum benda fólki á; að upplýsa börnin sín vel um þær hættur sem fylgja því að renna sér niður úr Siglufjarðarskarði. (meðfram akveginum)  Þetta er ótrúleg slysagildra ef ekki er vel að sér gáð.  Það má ekki mikið út af bera þegar börnin eru að renna sér niður, eins og í ljós kom í gær þegar við lentum í þeirri skelfilegu lífsreynslu að keyra næstum því yfir dreng sem var að renna sér niður úr skarðinu í gær. Hann var á bretti og renndi sér niður meðfram veginum og allt í einu skipti engum togum að hann missir vald á brettinu þannig að hann stefndi beint út á veginn og fyrir bílinn, mikil hálka var á veginum en fyrir snarræði ökumanns og ABS bremsukerfi bifreiðarinnar gat hann afstýrt stórslysi og betur fór en á horfðist. 

Drengurinn lá eftir á miðjum veginum skelfingu lostinn en bifreiðin lenti út í móum og þar sátum við pikkföst og í algjöru sjokki.

Eftir þessa lífsreynslu í gær þá þykir mér full ástæða til að vara bæði ökumenn sem keyra upp og niður Skarðsveginn og foreldra barna, við því að leyfa þeim að renna sér meðfram veginum.   -- Með vinsemd og þökk -- Helga Kristín Einarsdóttir og Úlfur Guðmundsson 

 Fimmtudagur 20. janúar 2005  

Fréttatilkynning:  

Síðastliðinn þriðjudag undirritaðu Hermann Einarsson fyrir hönd  SR-Vélaverkstæðis og Sigurður Bjarnason fyrir hönd ESSO, þjónustu og umboðs samningur milli Olíufélagsins ESSO og SR-Vélaverkstæði, þess efnis að SR-Vélaverkstæði sér um sölu og dreifingu á öllum vörum frá ESSO á Siglufirði. - SR-vélaverkstæði er með lager af smurolíum, smurfeiti ofl sambærilegum vörum. Einnig verður til sölu í SR-Byggingavörum; vörur í neytendapakkningum fyrir bílinn og heimilið.

Á næstu dögum munu viðskiptavinir verslunar okkar sjá þess merki að ESSO vörur verða sýnilegar og á mjög góðum verðum. Nánari auglýsing verður birt í næstu "Tunnu" með opnunar tilboðum á ýmsum vörum

 Föstudagur 21. janúar 2005 Aðsent:     Kæru Siglfirðingar! 

Nú er kominn sá tíma að ásókn í útivist á firðinum okkar frábæra er að aukast með hækkandi sól! Það er mjög fjölbreytt útivist stunduð á Hólsdalnum, í Skarðinu og hér upp um öll fjöll. Þess vegna er mjög áríðandi að við tökum tillit til þarfa hvers annars í umferðinni. 

Nú þegar einungis Drottningarbrautin (Snorrabraut) er fær, fer um hana mikil umferð. Það er bæði gönguskíðafólk, göngufólk, skokkarar, hundafólk, ríðandi umferð og fólk á bílum á leið úr og í Skarðið eða bara fólk á “rúntinum”. Öll eigum við þarna jafnan rétt til að njóta. 

 Mig langar að biðja vegfarendur til að taka meira tillit til okkar ríðandi manna en stundum hefur verið. Því miður höfum við ekki aðra leið að ríða en þessa fyrr en snjóa leysir fram á Hólsdal og víðar.

 Við reynum eftir fremsta megni að taka tillit til annarra en hestarnir eru sumir viðkvæmir fyrir hraðri umferð og hávaða og gætu því átt til að hlaupa út undan sér og það valdið slysi ef ógætilega er farið. 

Við viljum gera hvað sem er til að koma í veg fyrir það og biðjum ykkur vegfarendur að sýna okkur meiri tillitssemi. Um leið vil ég minna félaga mína á að sýna annarri umferð tillitssemi og muna eftir endurskinsmerkjum á hrossin, fatnað og tilheyrandi

Fyrir hönd hestamanna   ---   Sævaldur Jens Gunnarsson