Föstudagur 1. apríl 2005 -- 

Óskar Berg Elefsen, sem á heima syðst bænum með gott útsýn yfir Langeyrartjörn  hringdi í mig í morgun og  sagði mér að svanirnir væru komnir.  - Hann hefði heyrt í þeim í gærkveldi um það leiti sem hann fór til hvílu og sá þrjá svani á Langeyrartjörn fyrir neðan hús sitt. 

Ég hélt fyrst að þetta væri aprílgabb hjá vini mínum, en hann sárt við lagði að þetta væri sannleikur. 

Ég lét til leiðast og fór fram að tjörninni og sá strax þrjá hvíta svani. 

Þeir voru úti á miðri tjörn, svo ég skellti aðdráttarlinsu á vélina og smellti.

Þeir voru komnir núna rúmum hálfum mánuði fyrr en venjulega og þrátt fyrir fjarlægð og snjóél náðust þessi þokkalega góð mynd til vinstri. 

En þegar ég fór sunnar á bíl mínum á Langeyrarveg til að snúa við, þá rak ég augun í fuglana sem sjást á myndinni  hér til hliðar, þar með svartan svan og voru þeir alveg við veginn syðst í tjörninni þar sem nesið skagar inn í tjörnina og myndirnar sem ég tók  þar tók ég margar myndir. 

Ekki er nokkur vafi á að þessi koma svarts svans hingað á Siglufjörð, er einstakt fyrirbæri, enda margir á vettvangi til að virða hann fyrir sér og einn utan mig var með myndavél sem var í kapp við mig um fjölda mynda af svaninum. 

 Laugardagur 2. apríl 2005

  Ein gömul:

Snurpað fyrir ufsa í júnímánuði árið 1967. 

Þarna er Páll Pálsson og synir, á bát sínum Guðmundur Jón SI 22 úti á miðjum Siglufirði.

 Laugardagur 2. apríl 2005 - 

Aprílgabb 

Ég tel það nokkuð víst að flestir hafi áttað sig á (ekki  þó allir) að "fréttin" af þeim félögum Valgeir Sigurðssyni og Fischer hér fyrir ofan hafi verið aprílgabb. 

En ég hefi einnig fengið það staðfest frá mörgum sem létu glepjast af öðru gabbi, með því að senda mér póst og segja mér frá því að þeir hafi aðeins séð þrjá svani á Langeyrartjörn og enginn þeirra hafi verið svartur, hann hafi verið farinn. 

Það var einmitt aprílgabb númer tvö: Það var enginn svartur svanur á tjörninni í gær, aðeins þrír hvítir svanir á fullu við að sækja sér æti sem þarna virðist vera nóg af í tjörninni. 

Myndin hér er af tveim þeirra sem oft létu vel hvor af öðrum á meðan ég staldraði við í gærmorgun.   

Miðvikudagur 6. apríl 2005  

Vorið fraus í norðanbyl og fönn. 

Svona fór fyrir fyrsta túnfíflinum sem opnaði skærgula krónu sína við Laugarveginn í lok mars. 

Við héldum líka í einstaklega góðu veðri með sólskini og hita að vorið væri komið.  En þá kíkti veturinn enn í heimsókn sem við vonum bara að verði stutt. -  -- 

Það er ekki óalgengt að krókusar og aðrar garðajurtir blómstri í góðri tíð á þessum árstíma. 

En að íslenskur villigróður spretti eins og þessi fífill í mars eða apríl er mjög sjaldgæft.  Fréttaritari Lífið á Sigló    

 Miðvikudagur 6. apríl 2005 

Aðsent: 

Karlakór Siglufjarðar og Þrestir með sameiginlega tónleika --- Karlakór Siglufjarðar hélt velheppnaða tónleika í Bátahúsi Síldarminjasafnsins á Siglufirði um nýliðna páska. Laugardaginn 9. apríl nk fer karlakórinn suður ásamt hljómsveit og sækir Hafnfirðinga heim. 

Karlakór Siglufjarðar heldur tónleika í Hafnarfjarðarkirkju kl. 16.00 og mun Karlakórinn Þrestir taka þátt í þeim tónleikum. Karlakórarnir munu syngja hvor um sig og einnig sameiginlega hefðbundin karlakórasöng auk þess sem gestirnir að norðan munu bjóða upp á léttan söng með hljómsveit.  --

 Stjórnandi Karlakórs Siglufjarðar er Elías Þorvaldsson en stjórnandi Karlakórsins Þrasta er Jón Kristinn Cortez.   (Ljósm. SK)