Sunnudagur 15. ágúst 2004 

Nokkrir skipverjar af Mánafoss slöppuðu af og skoðuðu Síldarminjasafnið, en þeir luku við losun og lestun hér fyrr en venjulega og skoðuðu safnið skömmu áður en haldið var úr höfn áleiðis til Dalvíkur. 

Á myndinni eru auk skipverja, 

Sigurður Sigurðsson hafnarvörður lengst til vinstri, börn skipverja sem með voru í för og Hreiðar Jóhannsson starfsmaður Þormóðs Eyjólfssonar lengst til hægri. (Eimskip) Nöfn skipverja hefi ég ekki. 

Mánudagur 16. ágúst 2004  

Ein gömul:  1963 +/-

Hörkuskot, en hvar er boltinn? 

Hann fór yfir markið; kappleikur K.S. og Hofsós í handbolta kvenna.

Guðný Ósk Friðriksdóttir, þarna í markvörslu 

Þriðjudagur 17. ágúst 2004 

 Eldri borgarar á Siglufirði lögðu af stað í morgun klukkan 08:00  í 5 daga ferðalag vestur á Ísafjörð og nágrenni. Það var ánægjusvipur á fólkinu við brottför í morgun, eins og sjá má á nokkrum myndum sem ég tók við það tækifæri. 

(ég fór ekki með- er ekki nógu gamall !) 

Myndir frá brottförinni HÉR

 Miðvikudagur 18. ágúst 2004  

Ég frétti af því að Sveinn Rúnar Hauksson læknir  hefði komið til Siglufjarðar, hann er vel þekktur undir nafninu berja doktorinn og fyrir þekkingu sína og störf í þágu Félags Palestínumanna á Íslandi. Hann hefur farið til berja hér innan fjarðar og einnig farið til Héðinsfjarðar og með honum var Valþór Stefánsson læknir.  

 Erindi Sveins hingað var að kanna ástand berjalanda hér fyrir norðan, í Fljótunum, Siglufirði og Héðinsfirði.   Meðal þess sem úr þeirri rannsókn og yfirferð kom; var að berin eru allsstaðar orðin vel þroskuð og raunar vikum fyrr en venjulega. En borið hefur á einni tegund lirfa sem farin er að gæða sér á lynginu og hvetur hann eindregið til, að fólk sem á annað borð ætlar til berja, fari fyrr en seinna til þess, því gera má ráð fyrir að annars verði lirfurnar búnar að eyðileggja vaxtarmöguleika berjanna innan skamms tíma. Ég heimsótti Svein og konu hans Björk Vilhelmsdóttir, þar sem þau dvelja í Sæbylhúsinu. Þar voru einnig fyrir; Örlygur Kristfinnsson safnvörður og Páll Helgason. Ég þáði þar kaffi og heita ástarpunga- og auðvitað ber.  Myndirnar skýra sig sjálfar, en myndin af laufblaðinu er af berjalyngi- og sýnir hvernig lirfa er búin að éta og mergsjúga það. 

Föstudagur 20. ágúst 2004  

Skattstjórar  víða að af landinu ásamt starfsliði sínu, ráðuneytisstjóri og fleiri embættismenn komu gangert í heimsókn í Síldarminjasafnið seinnipart í gær.

 Þetta var 55 manna hópur sem naut leiðsagnar Boga Sigurbjörnssonar skattstjóra og Örlygs Kristfinnssonar safnvarðar um safnið- og þáði hópurinn hinar hefðbundnu veitingar, síldarréttir og brennivín, þeim sem vildu og aðrar léttari veigar. 

Bogi sagði gestina mjög ánægða með heimsóknina- og safnið í heild. 

Laugardagur 21. ágúst 2004  

Gæsaveiðitíminn, er víst hafinn. 

Þetta er Sævar Guðjónsson, nýkominn úr veiðiferð með stóran feng sem hann fékk í félagi við annan. 

Þarna er hann að "plokka" eina gæsina- en gaf sér tíma til að líta við fyrir ljósmyndarann.