Хыр изышъунэу зыӏуагъэр Хъуаджэм зэрэхищыжьыгъэр

Куп зэхэсмэ зэнэкъокъу къахэхьагъэти, лӏы горэм хыр ришъунэу ӏуагъэ ышӏыгъ. Мэфэ заулэкӏэ хым кӏонхэшъ, лӏым хыр рырагъэшъунэу, зыришъукӏэ, зыфаем фэдиз дышъэ ратынэу, зыримышъукӏэ аукӏынэу зэзэгъыгъэх.

Нэф къызэшъым хыр изышъунэу зыӏуагъэр кӏэгъожьыгъ. «Мы делэ купмэ сызэрэсэмэркъэугъэр амышӏэу яшъыпкъэу унашъо къыздашӏыгъ. Хыр хэты ришъун. Ау мы купым игущыӏакӏэ шӏоп, сыхэмыхьажьыщтымэ, сякӏодылӏэнкӏэ щынагъо», - джахэр зэриӏожьхи, хэхьажьынэу ежьэжьыгъэу кӏозэ, Хъуаджэм ӏукӏагъ.

- Тыдэ уежьагъ? - Хъуаджэр къеупчӏыгъ. Лӏым иежьакӏэ къыӏотагъ.

- Ащыгъум дышъэ къошыныр а купым къышӏопхьыщт, ау ащ ызыныкъо къысэптыщт, - ыӏуагъ Хъуаджэм.

- Дышъэм хэт пылъыжь, таӏэкӏэрэмыкӏуадэри.

Хъуаджэм лӏым зэрэзекӏощтыр риӏотагъ.

Зыфаӏогъэ уахътэр къэси, купыр хым щызэӏукӏагъ. Лӏым ылъэкӏапӏэ дищаий хым хэхьагъ, псым ешъо фэдэу тӏэкӏурэ хэти къызэджэкӏыгъ:

- Мыщ псэу дэтыр бэрэ сыпэрэлъ, макӏэрэ сыпарэлъ исшъущт, ау псыхъоу къыхэлъадэри псы лъакъоу къекӏуи шъо шъуубыт!

- Ар сыдэущтэу тыубытын?

- Шъумыубытыщтмэ, дышъэ къошыныр къашъуштэ. Сэ хыр исшъунэу сӏуагъэ нахь, псыхъори исшъунэу гущыӏэ стыгъэп, - къажэхэхьагъ.

Дышъэ къошыныр къашӏуихьи, Хъуаджэмрэ ежьыррэ зэфагощыжьыгъ.