Пӏэкӏорым тезэрэгъэфагъэхэп
Хъуаджэм къызищэжьыгъэр бэ мышӏагъэу ишъузи шӏошъузы дэгъоу, зэрилъэкӏэу ыгъашӏоу хэтыхэзэ, чэщ горэм гъолъыжьыгъэхэу щылъхэу шъузыр лъэшэу хэщэтыкӏыгъ.
- Сыд арэу узыгъэщатэрэр? - ыӏуи, еупчӏыгъ.
- Сызыгъэщэтэн щыӏ, ау ори сэри зи ащ хэтшӏыхьажьын тлъэкӏыщтэп. Кӏо, загъорэ сызэгоуты зыхъукӏэ, сэщатэ нахь, - ыӏуи, зыфэщэтагъэм ышъхьашыгу къыримыхэу игущыӏэ ыгъэтӏылъыжьыгъ.
- Къаӏо арэу къыохьылъэкӏырэр? Тыамалмэ, амал тыпфэхъун.
- Сыд хэпшӏыхьан плъэкӏын ащ, хьадэгъур ӏахьы мыгощ, хьадэгъум ыхьыгъах.
- Хэт сэӏо а зыфапӏорэр? - ыӏуи, Хъуаджэр ишъузы еупчӏыгъ.
- Зыфасӏогущэрэр апэрэлӏэу сиӏагъэр ары. Ар щыӏагъэмэ, нибжьи игухэкӏи сшӏэныеп, гуми исынэныеп.
Ятӏонэрэ чэщым Хъуаджэмрэ ишъузрэ гъолъыжьыгъэхэу щылъхэзэ, Хъуаджэр лъэшэу хэщэтыкӏыгъ.
- Сыд, Хъуаджэ, мырэу узыгъэщэтагъэр? Усымаджа, хьаумэ гухэкӏ горэ уиӏа? - ыӏуи, шъузыр къеупчӏыгъ.
- Сысымаджэп, къысэхъулӏагъи щыӏэп, ау сишъузыгъэр сыгу къэкӏыжьыгъэти ары. Сыгу къэкӏыжьымэ, загъорэ сыхэщэтыкӏы, - ыӏуагъ мыдырэм.
- Адэ, ащыгъум арэу пщымыгъупшэрэ уишъуз дэгъум дэжь гъэзэжьба! - ыӏуи, шъузым ыкӏыб Хъуаджэм къыфигъази, гъолъыжьыгъэ.
- А тхьамыкӏэр щыӏэжьэп нахь, зэрэсхъожьын щыӏэгъахэп, - ыӏуи, Хъуаджэр къеӏункӏи, шъузыр пӏэкӏорым къыридзыхыгъ.
Шъузым губжыгъаеу чэщыр рихыгъ. Нэф зэрэшъэу ытыщы ыӏопщи, ышыхэр къаригъэщагъэх.
- Сэ Хъуаджэм нычэпэ къысишӏагъэр гухэкӏ, сэри сиушъхьакӏугъ, шъори шъуиушъхьакӏугъ. Къысэзауи, пӏэм сыкъыхидзи, джэхашъом сыкъытыридзагъ. Ар лӏы cӏoy сыкӏыгъужьын слъэкӏыщтэп!
- Хъуаджэ, - аӏуагъ шъузым ышымэ, - тшыпхъу тхьаусхэу къыӏуагъэр зэхэпхыгъэ, о сыд къепӏолӏэщт ащ? Марэ мыхъоу сыда хъугъапэри?
- Хъугъэшхуи щыӏэп. Шъузым илӏыгъэр зы чэщы типӏэ къыхэгъуалъхьи, тыкъигъэгумэкӏыгъ, ау бырсырым ӏофыр нэзгъэсыгъэп. Джы нычэпэ кӏуагъэм сэ сишъузыгъэри къакӏуи къытхэгъолъхьагъ. Нэбгыриплӏэ а зы пӏэм тыхэзэрэмыгъафэ хъуи, мыгъор агъун аӏуагъ, шъушыпхъу агъунэкӏэ щылъыти, къырагъэфэхыгъ. Джары къытэхъулӏагъэр, - зеӏом, зэшитӏоу къэкӏуагъэр къызэплъ-зэплъыжьэу рагъэжьагъ.
- Джы къэсшӏагъ сыкъезыдзыхыгъэр, Хъуаджэм лажьэ иӏэп, - ыӏуи, шъузыр къахэгущыӏагъ.
- Хэт адэ лажьэ зиӏэр?
- Зилажьэр сэры, лажьэ къызыпыкӏыгъэр сыжэ, - ыӏуи шъузым, ащ щызэшӏужьхи, зэшитӏури кӏожьыгъэх.