Жэмал
Щӏагъуэу зэхамыӏуэу,
Фӏыкӏи и цӏэ ирамыӏуэу,
Дэст ди къуажэм Жэмал.
Кӏэлъэфт, – хуагъуэттэкъым ӏэмал.
– Жэмали?.. Ӏуфх адэ! –
Ауан хэлъу хъущӏэрт дадэр, –
Лэжьыгъэм зыщегъэпщкӏу.
Ар мылэжьэф шхэрейщ, –
Хужаӏэрт хъыджэбзхэм, – хьэулейщ.
И бадзэу иӏэт дзыр,
Хэти хъуэрыбзэ къридзырт.
Жылагъуэм я ауант,
Щӏэнакӏэрт абы цӏыху мелуан.
Кӏэщӏу жыпӏэм, Жэмал,
Кӏуэдыным иӏар бетэмалщ…
Пэжщ, арщ зэрыщытар,
Ауэ фщӏэрэ иджы къэхъуар?
Дауикӏ, фщӏэркъым, – пэжкъэ?
Атӏэ федэӏу! – Дэ вжетӏэнкъэ!..
Жэмал къуажэр щотхъур,
Лӏыжь-фызыжьхэр малъхъэу лъохъур.
Псоми къыхуащӏыр щӏыхь,
Тхьэӏухудхэр абы йопщӏыхь.
– Ей-ей, ди Жэмали!
Дыщэщ! Ди жылэм зы щӏали
Дэскъым Жэмал текӏуэн,
Лэжьыгъэфӏкӏэ абы пэхъун!..
Щауэм и сурэтыр
Мисыр, феплъыт, тетщ газетым,
Радиор къохъуэхъур,
Къэрал псом цӏэрыӏуэ щохъур.
Хэти къыхуещӏ нэмыс,
И фӏыщӏэр псоми зэлъощӏыс.
Атӏэ дэнэ къикӏа?..
А насыпыр сытым къихьа?
Хэхуагъэм къыпэкӏуащ,
Гуащӏэдэкӏым ар къыдэкӏуащ.