Ецохъулӏи зыригъэущыгъ

Огъушхо хъугъэти, чылэм дэсыр тхьалъэӏу ашӏынэу дэкӏыгъ. Ефэндыр апэ ит, тхьэм елъэӏухэшъ зэхэтых, ау ощхыр къэблагъэрэп. Арыти, Хъуаджэм къыӏуагъ:

- А ефэнд, мы чъыгым удэкӏоягъэмэ, тхьэм нахь пэблагъэ ухъуни, пӏорэри тхьэм зэхихыни. Зэхихымэ, уилъэӏу къыпфишӏэн.

Ефэндыр чъыгым дэкӏоягъ. Ащ тесэу тхьэм елъэӏузэ, ошъопщэ гъощагъэ горэ чыжьэкӏэ къэлъэгъуагъ.

- О ефэнд, ошъуапщэр къэлъэгъуагъ, нахь лъэгаӏоу удэкӏоягъэмэ, ишӏуагъэ къэкӏощтгъагъэ.

Ефэндыр джыри нахь лъагэу дэкӏоягъ. Тхьэм ишъыпкъэу елъэӏу. Ащ тефэу ощхыцэ зырызхэр къыпхъыгъэх.

- О ефэнд, чъыгшъхьапэм унэсыгъэемэ, дэгъу дэдэ хъущтгъагъэ. Мардж, тхьэм зэхегъэх.

Ефэндыр чъыг шъхьэпэ дэдэм нэсэу дэкӏоягъ, тхьэм елъэӏу. Ащ ехъулӏэу ошъопщэ гъощагъэр къашъхьарыхьи, шыблэр къэуагъ, ощхыми къыритӏупщыгъ. Пчыкӏэу къэхъупкӏагъэм ефэндыр чъыгышъхьэм къыриутэхыгъ.

Ошъуапщэри кӏодыжьыгъэ, ощхыри зэпыужьыгъ. Ефэнд хьадэм рашӏылӏэщтыри раӏолӏэщтыри амышӏэу купыр шъхьарыт.

- Джары «дэкӏуай, дэкӏуай» пӏозэ, тиефэнд шыблэм къебгъэукӏыгъ, - ыӏуагъ купым щыщ горэм, Хъуаджэр ыгъэмысэу. Арыти, мыдырэми джэуап ритыжьыгъ:

- Арэп, «нахь лъагэу дэкӏуаери, титхьалъэӏу тхьэм зэхегъэх» сӏуагъэ нахь, «ецохъулӏэри зыкъегъэукӏ» сӏуагъэ пшӏошӏа?!.