Хъуаджэм шӏыхьафыр зэриукъуагъэр

Хъуаджэм ыш ефэндыр былымкӏэ бзаджэщтыгъэ. Ар ащ фэдэу нэе-псыеу, былым ехъурэ напэ имыӏэу зэрэщытыр Хъуаджэм ыдэщтыгъэп, ренэу зэриумысыным, зызэрэригъэшӏэжьыным тетэу пэгъокӏыщтыгъэ.

- Неущы, щэджэгъо нэмазыр зязгъэшӏыхэрэм, шӏыхьаф сшӏыни, сикъакъыр ныкъошӏ язгъэухыщт, - ыӏуагъ ефэндым.

- Сыдэсымэ сэри сыкъэкӏон, - ыӏуагъ Хъуаджэм.

Ятӏонэрэ мафэм ефэндым щэджэгъо нэмазыр аригъэшӏызэ, зызеуфэм, шӏыхьаф зэриӏэр зэрариӏощт шӏыкӏэм игупшысэ къышъхьэщыхьи зэрэуфагъэу, егупшысэу бэрэ щысыгъ.

Ефэндым ишэнхэр зэкӏэ дэгъу дэдэу Хъуаджэм ышӏэщтыгъ. Джащ фэдэу ышӏэщт горэм егупшысэу зыхъурэм ефэндыр шъхьэщихыщтыгъ, нэмазыр щыгъупшэжьыщтыгъ.

Арыти, зыкъимыӏэтыжьыхэ зэхъум, Хъуаджэр къэтэджыжьи, зэкӏэмэ зэхахэу къыӏуагъ:

- Кӏо, ащыгъум, шъо шъущысыгу, сэ сиощ къэсштэни, шӏыхьафым сыкъэкӏон.

Ефэндыр укӏытэжьи, а мафэм шӏыхьаф ышӏыжьыгъэп.