Хъуаджэм ипаӏо зэрищагъэр
Хъуаджэм сатыу шӏукӏае ышӏыгъэу, къежьэжьыгъэу, кӏэкӏо зэпылъ ыщэфын зэрэфаер ыгу къэкӏыжьыгъ. Тучан горэм чӏахьи къыщэфыгъ, тучантесым езэгъи ригъэгъэтӏылъыжьыгъ: «Цӏыф сигъусэу сыкъызычӏахьэкӏэ сщэфыщтым фэдэу къэозгъэштэщт, сштэу сызежьэжькӏэ, «адэ ыпкӏэ къэптыщтба!» - ӏори къысаӏу, сипаӏо къызыщысхэу къызпфэзгъэсысыкӏэ, зи къысэмыӏожь, мыр уихъупхъапкӏэ» - ыӏуи джыри ахъщэ ритыгъ. Нэмыкӏ тучан горэм чӏахьи, мыдырэм фэдэу язэгъи щазымэ дэгъуитӏу щаригъэгъэтӏылъыгъ.
Хэты сыӏукӏэн шӏо ыӏоу кӏозэ-уазэу урамым тетзэ, ячылэ щыщ баеу зэгорэм чӏыфэ къезымытыгъагъэм ӏукӏагъ.
- Сыд, Хъуаджэ, мыщ укъэзыхьыгъэр? - къеупчӏыгъ адрэр къекӏэнэкӏашъоу.
- Ашъыу, тӏэкӏу сыщафэ сшӏоигъуагъ.
- Сыдкӏэ ущэфэщта, цӏэкӏэ мыщ щэщэх пшӏошӏа?! - нахь шъхьаихыгъэу къыдэхьащхыгъ.
- Некӏоба, уахътэ уиӏэмэ, ори укъыздеплъын, - пигъодзыжьыгъ Хъуаджэм зи мыхъугъахэ фэдэу.
Адрэми Хъуаджэм ыщэфыщтыр зыфэдэр ышӏэ шӏоигъоу къыдежьагъ.
Ыпэрэ тучаным чӏахьэхи, Хъуаджэр щыгъынмэ бэрэ ахэплъагъ, етӏанэ аригъэгъэтӏылъыгъагъэр къышти, «некӏожьых» - ыӏуи къежьэжьыгъ. Игъусэу плъэгъурэм Хъуаджэм кӏэкӏо зэпылъэу къаригъэштагъэм ынэ къыфезы, ащ ыпкӏэ Хъуаджэм ытышъущтымэ ышӏэрэпи ынэхэр укъыгъэх.
- Адэ ыпкӏэ къэптыщтба? - тучантесыр къэупчӏагъ.
Хъуаджэм пэӏо нэщэ цӏыкӏоу щыгъыр зыщихи зыфегъэсысым, адрэм «хъугъэба ащыгъум» ыӏуи къыпылъыжьыгъэп. Ятӏонэрэ тучаным джаущтэу щазымэ кӏэпситӏур къычӏихыгъ.
- Арэп, сыд пэӏо накъа мы пщыгъыр? Къысащ! - къышӏонагъ.
- Хьау, осщэщтэп, - Хъуаджэр гугъу елӏыгъахэп. Сыд Хъуаджэм зеӏуи къышӏомыкӏэу пэӏо нэкъэ цӏыкӏур баим осэшхокӏэ ыщэфыгъ. Хъуаджэри «къэсэхь-къэсэшх!» - ыӏуи зыкъызэкӏиукъутами ядэжь къэкӏожьыгъ.