Ар псори хъарзынэщ

Пӏытӏитӏэ щӏалэ фызкъэмышэу зауэм къикӏыжат. Зы мазэ хуэдэ дэкӏауэ хъыджэбз гуэр къыщыхущӏахым, и ныбжьэгъу щӏалитӏи зыщӏигъури, хъыджэбзаплъэ кӏуащ. Дэбгъуэн щымыӏэу хъыджэбзыр дэгъуэт.

Зы бжьэ цӏыкӏу зэрефэу, Пӏытӏитӏэ и щхьэ щытхъужу щӏидзащ. Абы жиӏэ псори уи фӏэщ пщӏымэ, нэмыцэ армэр «хэпщӏыкӏыу цӏырхъ ищӏат», Берлин япэ дыдэу дыхьахэм ящыщт, Рейхстагым Совет ныпыр фӏэзыдзахэми яхэтат. «Советскэ Союзым и Лӏыхъужь цӏэр къысфӏащыну, – дыщӏигъужащ абы кӏыхьу къригъэкӏуэкӏа хъыбар мышыум, ди дивизэм и генералым зэпиудыжащ, «Си пхъур пшэн бдэркъым!» – жиӏэри.

– Ар псори хъарзынэщ, щӏалэфӏ, – жиӏащ хъыджэбзым, Пӏытӏитӏэ иӏуэта хъыбарым и жэуапу, – ауэ уэ кӏакхъу щӏумыч щӏыкӏэ топышэм уигъэундэращхъуэу фронтым укъызэрыӏуахыжар, абы иужькӏэ зэи узэрыӏумыхьэжар щхьэ убзыщӏрэ?

– Ар… ар уэ дэнэ щыпщӏэрэ, си дахэкӏей? – къэуӏэбжьащ Пӏытӏитӏэ.

– Иджыпстущ сэ укъыщысцӏыхужар, «лӏыхъужь». Абы щыгъуэ угъуэгыу фронтым укъыӏузыхыжа санитаркэр сэращ, – къыщыдыхьэшхащ абы цӏыхубзыр.