Жаӏэ
Узмыцӏыхухэм жаӏэ:
Уэ нэхъ фэншэ дунейм зы темыту,
Хэт и щӏали гу лъэпкъ «къыплъимытэу»,
Ауэ ахэр си нэкӏэ къозгъэплъатэм,
Си ӏуэхут уэ апхуэдэу укъалъагъуатэм.
Узмыцӏыхухэм жаӏэ:
Уэ нэхъ бзаджэ жылэм цӏыху дэмысу,
Уэн блэ фӏыцӏэу хэти зыпыщӏэпсэу,
Ауэ абыхэм си жьэр ящӏэтатэм,
Си ӏуэхут, дахэ, ар къыпхужаӏэфтэм.
Узмыцӏыхухэм жаӏэ:
Унэгуащэ уэ къыпхэмыкӏыну,
Хуэмыгъэр уэ пкӏэрымыкӏыну,
Ауэ сэ си пӏэм ахэр изгъэуватэм,
Си ӏуэхут уэр фӏэкӏ плъапӏэ зыми ищӏтэм.
Узмыцӏыхухэм жаӏэ:
Лъагъуныгъэ жыхуаӏэр умыцӏыхуу,
Ар зи бийхэм уэри уащыщ цӏыхуу,
Ауэ си гур абыхэм якӏуэцӏылъатэм,
Си ӏуэхут уэ апхуэдэу уакъыщыхъутэм.
Узмыцӏыхухэм жаӏэ:
Уи гур, Ланэ, абрэмывэу быдэу,
Адрей пщащэхэм зикӏ уахуэмыдэу.
Сарэзыщ, жыреӏэ! Жыреӏэ, жаӏэм.
Ирещӏ си фӏэщ, ахэм къару яӏэм.