Жангуащэ
И нэбжьыц кӏыхьхэр еӏэтри,
Нэ къуэлэн дахэр къыщӏоплъ;
Ӏупэплъ пӏырыпӏхэр зэтожри,
Щынэдзэ хужьхэр къыщӏоплъ.
Ар сурэт тхауэ Жангуащэщ, –
Псоми псэм хуэдэу ялъагъу;
Ар тхьэӏухуду дэгъуащэщ,
И джийм ежэх псыр уолъагъу.
Мазэщӏэ ныкъуэу набдзитӏыр
Къурашэу нызэпэщылъщ.
Ӏэдийуэ и щхьэц фӏыцӏитӏыр
Лъэдакъэм теуэу нытелъщ.
И нэкӏур дыхьэрэныплъщи,
Уеплъамэ, нурыр кърех;
Псэлъамэ, бзэ ӏэфӏ ӏурылъщи,
Плъэмыкӏыу уи гур дехьэх.
И ӏэпэм дыщэр къыпощыр,
Зэӏусэм псэ хилъхьэ пфӏощӏ,
Къохъуапсэ жылэр а пщащэм,
Тхьэм насып натӏэ ар ищӏ.