Искрэ

Колхоз щызэгухьа гъэхэм языныкъуэ унафэщӏхэм ирагъэлеиӏуэу щытащ. Абыхэм ящыщ зыт Хъыжьокъуэ Тӏатӏуни. Техникэм зыри химыщӏыкӏ пэтми, ар трактор бригадэм я унафэщӏу ягъэувауэ лажьэрт. Тӏатӏунэ нэхулъэр къыщищӏым шууэ губгъуэм дэкӏырти, тракторхэм яужь иту вагъэм хэтт. Махуэ псом езыми зигъэпсэхуртэкъым, трактористхэми жьыӏурыхьэгъуэ яритыртэкъым.

Апхуэдэу екӏуэкӏыурэ, зэгуэрым дыгъэ къухьэгъуэ нэсауэ, зы трактор ункӏыфӏри къэувыӏащ. Трактористри къелъэри иджыпсту къызэригъэдзэкӏа вагъэм хэувэжащ, ӏэпхъуамбипщӏымкӏэ зэӏищӏэу.

– Сыт къэхъуар? – Тӏатӏунэ шыжьэрыутӏыпщу абы къыбгъэдэлъэдащ.

– Искрэр кӏуэдащ! – жэуап итыжащ трактористым, нэщхъейуэ.

– Ӏэлыхь-ӏэлыхь!.. Дыбгъэунэхъут!.. Мис иджыщ-тӏэ сагъызыр шэдым щыхэхуэпар! – Тӏатӏунэ къэгузэващ.

Трактористым зэрыхигъэхьэщэ щӏагъуэ щымыӏэу, тӏури ешу къызэпридзэжыху, искрэм лъыхъуащ. Ямыгъуэтыжыххэ щыхъум, зи щхьэ лъы илъэда бригадирыр къызэфӏэувэжащ:

– Упыкӏащ абы гъущӏ и къамэу! Сэ мэтэресым сыкӏуэнщи, иджыпсту къэзгъэсынщ. Сыт жыпӏат абы и цӏэр?

– Искрэ!

Тӏатӏунэ псынщӏэу шым зридзри щӏэпхъуащ:

– Искрэ!.. Искрэ!.. Искрэ! – жиӏэурэ.

Здежьам нэсыху Тӏатӏунэ и щхьэм искрэ псалъэр ихужри, зыхуейр, сыт имыщӏамэ, ягуригъэӏуэфакъым. Арати, зыри къимыхьу, и щхьэр фӏэлэлу къэкӏуэжащ. Ар къыщысыжам фӏыуэ зызыгъэпсэхуа трактористыр еуэ иригъэшхыу вэуэ хэтт.