Хъуаджэм псэхэхыр зэригъэпцӏагъэр

Хъуаджэм уц зэмылӏэужыгъо бэкӏае ыжъуи, апч зэфэшъхьафхэм арикӏи, ӏалъмэкъ зэпедзэкӏым ригъэкӏугъ. «Ӏоф мыублэм блэ хэс аӏуагъ, егъэжьагъэ хъумэ, ари зыгорэу хъун. Зибэ пшӏэрэм урыӏаз, тыӏазэу едгъажьэмэ, дгъэхъужьыни къыхэкӏын, ӏазэхэр ӏазэ хъугъахэу янэ къелъфых пшӏошӏа?!» Джахэр зэриӏожьхи, ищыды ӏалъмэкъхэр тырилъхьэхи, ежьыри тетӏысхьи, игъогу техьагъ. «Мы ӏалъмэкъымэ уцэу арылъым фэдиз дышъэ къэсхьэу сыкъэкӏожьыгъагъэмэ, апэрэ унагъомэ сакӏэхьажьыни» - джащ афэдэ гупшысэ ӏэшӏумэ ахэтэу чылэ заули зэпичыгъ шьхьае, ӏэзакӏэ фэхъущтыри егъэжьакӏэ фэхъущтыри ышӏэрэп. Аузэ, укӏо зэпытмэ зыгорэм уӏукӏэны фаети, псэхэхым ӏукӏагъ.

- Хъуаджэ, тыдэ укӏорэ? - къеупчӏыгъ зыӏукӏагъэр.м - Сыӏэзэнэу сыкъежьагъ, - ыӏуагъ Хъуаджэм.

- Сыд уиӏэзакӏэ, сыд уз узыфэамалыр?

- Уз зэхэдз сиӏэп.

- Ащыгъум къэдаӏу, Хъуаджэ. О узэӏэзэшъуни щыӏэп, ӏэзакӏэми хэпшӏыкӏырэ щыӏэп. Ау угу умыгъэкӏоды, сэ сиуигъусэмэ, уиӏоф къыбдэхъун. Псэхэхыр сэры.

Хъуаджэр зэ къэщтагъ. Етӏанэ гу къызыӏэпишӏыхьажьи риӏуагъ:

- Псэхэхыр ӏэзэна, псэ хихын нахь.

- Адэ джарыба гъусэ сыкъызэрэпфэхъущтыр. Къедэӏу къыуасӏорэм. Сымаджэу зыдэжь уащэрэм дэжь сэ сыкъэсыщт, Сымаджэм ипӏэ лъапэ сыкъызытӏысыкӏэ, ар мыхъужьын сымаджэшъ, уафемыӏаз, иуз пӏэ къимыхьащтэу ӏо. Апэу зыщебгъэжьэщтыр мо чылэу къэлъагъорэр ары. Ащ бысым щышӏыри узэрэӏазэрэр щыӏуат, пщым ипшъашъэ пӏэ хэмыкӏыжьэу илъэсибл хъугъэу хэлъышъ, къыплъигъэкӏощтых. Кӏори еӏаз, пшъашъэр хъужьыщт. Ӏэзапкӏэу къыуатырэр тизэфэдэ.

Джаущтэу Хъуаджэмрэ псэхэхымрэ зэотэкъэгъу хъугъэх. Хъуаджэри мэгушӏо.

Бысымэу Хъуаджэр зэрихьылӏагъэр хьакӏэм рыкъэин бысымэу къычӏэкӏыгъ. Ихьакӏэ зэрэӏазэрэр, узыгъуиблы яӏэзэгъу зэришӏэрэр зэкӏэм зэрэчылэу зэлъашӏагъэ. Пщыми псынкӏэу къылъигъэсыгъэх.

- Мыщ сэ сеӏэзэн слъэкӏыщт. Ау уцэу есшӏэфыщтхэр джы нэс агъэфедагъэмэ анахь гъотыгъуай, анахь лъапӏ, - къыригъэжьагъ Хъуаджэм.

- Мылъку пае укъэнэщтэп, пшъашъэр гъэхъужьыри, - пщыми гуащэми къызэдырагъэштагъ.

Хъуаджэм пшъашъэр ыгъэхъужьыгъ, дышъэ къошыни ӏэзапкӏэу къыратыгъ.

Джаущтэу ригъажьи, Хьуаджэм мылъкушхо ыугъоигъ, ау мылъкум ызыныкъо псэхэхым ритынэу ыгу пыкӏыгъэп, зэкӏэ ядэжь къыхьи, къэкӏожьыгъ.

Бэ тешӏагъа макӏэ тешӏагъа, шъэжъые кӏэлъыкӏыгъэр ыӏыгъэу псэхэхыр Хъуаджэм дэжь къэсыгъ:

- Сыбгъэпцӏагъэшъ, джы о ппсэ хэсхыщт! - ыӏуи, псэхэхыр Хъуаджэм шъхьарыуцуагъ.

- Аукӏыщтыми гущыӏищ къырагъэӏожьы хабзэ, ори ар къысфэпшӏэнэу сыолъэӏу, - Хъуаджэр елъэӏугъ, псэхэхыри къезэгъыгъ, гущыӏищ къыригъэӏожьынышъ, къызыфиӏорэр фишӏэжьынэу тхьарыӏо ышӏыгъ. Хъуаджэм зы къыӏуагъ, тӏу къыӏуагъ, зыфиӏуагъэхэри къыфишӏагъэх. Ящэнэрэм зынэсым, рилъэшъухьэу ригъэжьагъ.

- Шӏэх, къаӏо, - еӏо псэхэхым.

- Сэ ар къасӏоу зыосэогъэукӏыфэкӏэ еж. Псэхэхыри ежэ зэпытыныя, ӏоф ӏаджи иӏэти, аужы ихьажьыгъ. Хъуаджэри псаоу, тхъэжьэу къэнэжьыгъ.