Лектор

Зэгуэрым зы лектор ди къуажэм къакӏуэри сыхьэт енкӏэ лекцэ къытхуеджащ, тутынафэным узыншагъэр зэрикъутэм теухуауэ. Лекцэр апхуэдизкӏэ лӏыхэм ягу хыхьати: «Абы иужькӏэ хэт тутын ефэми цӏыхугъэ иӏэкъым!» – жаӏэурэ куэд зэӏущащэрт. Уеблэмэ, щӏэкӏыжыху пэмыплъэу, языныкъуэхэм я тутын пашкӏэхэр кърахыурэ зэфӏаӏуантӏыкӏащ.

Лекторыр псэлъапӏэм къыщехыжым и ӏэпхъуамбитӏыр къишиящ:

– Ныбжьэгъухэ, зы тутын севгъафэт! Сыхьэт хъуауэ сефатэкъыми, си тхьэкӏумитӏыр къэбэгащ!