Хъуаджэм ибжыдзэгъалӏ

Хъуаджэм щхыу къошын къыхьызэ, пхъэзэкъо лъэмыджым къикӏыжьын фаеу хъугъэ. Хъуаджэр гумэкӏ хэфагъ: «Сыд иикӏыкӏэу сикӏын, къошыныр зыӏэмкӏэ сыубытмэ сӏэкӏэзын, ӏитӏумкӏэ сыубытмэ, сэ сефэхын». Заулэрэ щытыгъ шъхьай, нэмыкӏ икӏыпӏэ псыхъом иӏэп. «Тхьэм къысиӏолӏагъэм сыӏукӏэн» - ыӏуи, фэсакъыпэзэ лъэмыджым къытехьагъ. «А сиӏэлахь, семыгъэфэх, сищхыу исэмыгъэкӏут» - ыӏозэ, емыфэхэу лъэмыджым ыкӏи, чӏыгум зытеуцом, - «Узгъэпцӏагъ, узгъэпцӏагъ!» - ыӏуи, ошъогум зыдэплъыем, лъэпауи, ебэджыгъ, ищхыуи рикӏутыгъ, икъошыни убэтагъэ. - «О тхьэр, боу угъэшӏэгъоным, сэмэркъэу умышӏэрэр сшӏэгъахэп. Кӏо, ащ нахьыбэрэ сэмэркъэу къыбдэсшӏыжьынэп» - ыӏуи, къошын къутагъэм еплъэу зы кортрэ щытыгъ.

Мощ фэдиз зэрар иӏэу ядэжь кӏожьыныр ымыдэу Хъуаджэм къошын къутафэхэр къыугъоижьхи, дэгъоу зэхиуби, щыбжьый хьаджыгъэм фэдэу ыщэнэу бэдзэрым ыхьыгъ.

- Сыд мы пщэрэр? - аӏуи щэфакӏохэр къеупчӏыгъэх.

- Бжыдзэгъалӏэ сэщэ! - джэуап аритыжьыгъ.

Щэфакӏохэр къытезэрэхьэхи, бэри пэмытэу къошын убыгъэр Хъуаджэм ыщагъ, ахъщэ бэкӏаи кӏихыгъ. Ахъщэу ыщэфыгъэр къылъытэжьи, зыкъызэкӏиупкӏи къежьэжьыгъэу зылӏы горэ къылъычъи къеупчӏыгъ:

- Арэп, бжыдзэгъалӏэ пӏуи къытэпщагъэр зэрэдгъэфедэщт шӏыкӏэри кьытэпӏуагъэп.

- Къэуубытынышъ, ынэ кӏэптэкъощт, зи римыгъаӏоу къозэу ригъэшъыщт, - ыӏуагъ Хъуаджэм.

- Ащ фэдизэу тыпэлъыфэ тпӏыртӏымэ хъугъэба?!

- Аущтэу пшӏыми нахьышӏух, - ыӏуи, Хъуаджэр къежьэжьыгъ.