Жануэс зэрыкӏуэсар

Нанурэ Жануэсрэ жари ди къуажэм зы щӏалэрэ зы хъыджэбзрэ фӏыуэ зэрылъагъуу дэст. А тӏур зэрызэпылърэ ӏэджэ щӏат. Ауэ зэрышэу зы унагъуэу тӏысыжыну ӏэмал ягъуэтыртэкъым. Жануэс и адэ-анэм зратынур нэгъуэщӏ щӏалэт.

– Жануэс, си псэм хуэдэ! Къуажэ псом дэр фӏэкӏа ӏуэху яӏэжкъым, кхъыӏэ, мыпхуэдиз бэлыхьым дыхыумыгъэту къыздэкӏуаси ежьэж! – жиӏэри зэгуэр Нану хъыджэбзым елъэӏуащ.

– Содэ, тхьэ, – арэзы хъуащ хъыджэбзыр.

Етӏуанэ пщыхьэщхьэм щӏалэм Жануэс шыгум иригъэтӏысхьэщ, шыжьэрыутӏыпщу къуажэ уэрамым къыдэлъадэри, ищхъэрэкӏэ иригъэзыхащ. Хъыджэбзым кӏийуэ щӏидзащ.

– Уэуэур си махуэщ!.. Уэ сахь мыгъуэ!.. Залымыгъэкӏэ сахь!

Къыздихуари къыздикӏари ямыщӏэу къуажэм дэс милицэр шууэ шыгум къыпэуващ:

– Къэувыӏэ!

– Кхъыӏэ, щӏалэфӏ, ди ӏуэху къызумыхуэ!.. Сэ сфӏэфӏыпсу мыбы сыдокӏуасэ! – Жануэс милицэм елъэӏуащ.

– Нтӏэ, емынэм щхьэкӏэ зыпчэтхъэжу укӏийрэ? – щӏэупщӏащ милицэр.

– Залымыгъэкӏэ сахьауэ къуажэм ятезгъэӏуэнущи аращ, – къыпыгуфӏыкӏащ хъыджэбзыр.