Си Мурэ

Жэщыр хэкӏуэтащи

Уэздыгъэхэр мэункӏыфӏ.

Къуажэр жеижащи

Сэри, Мурэ, согъуэлъыж.

Тӏакъ-тӏакъ-тӏакъ; тӏакъ-тӏакъ-тӏакъ,

Къысфӏощӏ ди бжэм укъеуӏу.

Арщхьэ сыт? – Уи джэ макъ,

Мурэ, Мурэ, зикӏ къэмыӏу.

Нэху щыху жейм сезэгъкъым,

Си нэр къижу пӏэм сыхэлъщ.

Си гум уизгъэхуфкъым,

Уэркӏэ, Мурэ, бэлыхь стелъщ.

Уэра сфӏощӏри, Мурэ,

Къазыц щхьэнтэм зызошэкӏ.

Ауэ, Мурэ, уэрмырат,

Сыщыуауэ къысфӏыщӏокӏ.

Псори къызэроджэр,

Си псэ, уэ Мурат къудейщ.

Сэ сынызэроджэр

Мурэ цӏыкӏуу си дунейщ.

Тӏакъ-тӏакъ-тӏакъ; тӏакъ-тӏакъ-тӏакъ,

Кхъыӏэ, ди бжэм тӏэкӏу къеуӏу.

Сыхуозэш уи джэ макъ,

Си псэу Мурэ, зэ къэгъэӏу.