Макъым и къарур
Пщыхьэщхьэм зэрыжылэу театр хъарзынэ деплъауэ, щхьэж и унэ дыкӏуэжырт. Дунейри фӏыуэ къепсэпсауэрт.
– Уа, мобдеж зыгуэр хэлъ хуэдэу щхьэ къысщыхъурэ? – си гъусэхэм ящыщ зым ӏэпэр шэдымкӏэ ишиящ.
– Уэлэхьи ар Хъану тхьэмыщкӏэжь мыгъуэрагъэнмэ! – дыщӏигъужащ нэгъуэщӏ зыми.
Хъану си гъунэгъут. Зы зэман гуэрым абы нэхъ лӏы зэтет ди жылэ кӏыхьым дэсакъым. Ауэ фадэр нэрыгъ хуэхъури иджы абы и нэмысыр лъэгущӏэтын ищӏыжат.
Дыбгъэдыхьэрэ деплъмэ – Хъанут.
– Кхъыӏэ, мы тхьэмыщкӏэр я дей дывгъэшэж! – селъэӏуащ сэ си гъусэхэм.
Арщхьэкӏэ си жэрдэмыр къыздэзыӏыгъын къахэкӏакъым. Псори зэщӏэдыхьэшхащ, Хъану ауан ящӏри зэбгрыкӏыжащ.
Сэ абы сызэреӏусэххэу:
– Сефакъым! Уэ сефа мыгъуэкъым, Зулжан! Кхъыӏэ, сыгъэжей! – и фызым и цӏэр жиӏэри къыхэкӏиикӏащ.
Хъану къызэфӏэзгъэтӏысхьэмэ – укӏуриижырт, къызэфӏэзгъэувэмэ – зэфӏэщэхэжырт. Щымыхъужыххэм, ятӏэр къыкӏэрытӏэтӏу, си дамащхьэм теслъхьэри, схьыжащ.
А жэщым абы бэлыхьу стригъэлъар, уи адэр зыукӏам тепсыхауэ щытамэ, уигу щӏэгъунт. Сытми, жэщыбг дыдэхэм деж, ерагъкӏэ Хъану я унэбжэм ӏуслъэфэжащ. И фызым сыщеджэм, абы и макъ унэбжэм адэкӏэ къыщыӏуащ:
– Хэт ар? – жиӏэри.
Афӏэкӏа хэлъакъым: Хъану си дамащхьэм къепкӏэщ, я кӏэлындорым дэлъеижри къытеувэжащ:
– Еблагъэ, Жамболэт! – жиӏэри.
Фыз макъым апхуэдиз къару хэлъу хэт и гугъэнт?