«Сичӏыфэ о къыӏыхыжь...»

Хъуаджэр ермэлыкъым кӏуагъэу къыкӏухьэу итызэ ымышӏахэу ыкӏыбкӏэ зыгорэ къешъхьэшъоуагъ. Хъуаджэр губжыгъэу къызэӏэбэкӏи, къешъхьэшъоуагъэр къыубытыгъ. Адрэр къызеплъым щтэжьыгъэ, мэущтэуи къыриӏуагъ:

- Уакӏыбкӏэ, сигъусэ уфэдэти, ары сшӏошӏи, шъхьэшъоутын осхыгъэ, емыкӏу къысфэмышӏ.

Хъуаджэр хьыкумашӏэхэр зэриушэтыным ренэу пылъыгъ, джыри мары дэгъоу тефагъ. Арыти, къеуагъэм ыблыпкъ ыубыти, къадым рищалӏи, къехъулӏагъэр риӏотагъ: «Хабзэ шъошӏэмэ, зафэу шъудэзекӏонэу сыфай, утын къысихыгъ, орэпщынэ». Къадым шхъор зышӏагъэм ылъэныкъо зигъэзагъ, нахьыбэ къыфишӏэнкӏэ щыгугъэу. Лӏыр ышӏэщтыгъэу къычӏэкӏын. «Хэмыукъорэ щыӏэп, кӏо, хэукъуагъ, фэгъэгъужьи, шъузэшӏужь». - «Хьау, хьау, утын къысэзыхыгъэм аущтэу сешӏужьын слъэкӏыщтэп, зафэу тиӏоф къызэхэф, укъадымэ» ыӏуи, Хъуаджэм зыригъэнагъ.

Къадыр егупшыси, Хъуаджэр къызэрэшӏомыкӏыщтыр зешӏэм, къыриӏуагъ:

- Дышъэ сомэ ныкъо тесэлъхьэ, уезэгъа?

- Кӏо, хъун, макӏэ, ау макӏэми сыкъезэгъы, сыдэу пшӏын, о уиӏахьи къыӏыпхын фаеба, ешъхьэшъуаор ащ лъапӏэу къыфыдэкӏыщт, сыкъезэгъы.

Лӏыр иджыбачӏэ иӏэбэжьыгъ ахъщэр къырихынэу. Ащ дэжьым къадыр реплъэкӏи, лӏым накӏэ фишӏыгъ, «къемыт» къыригъэкӏэу. Адрэми ащ имэхьанэ къыгурыӏуи, ахъщэр къыримыхэу ыӏэ къырихыжьыгъ.

- Джыдэдэм ахъщэ сӏыгъэп, ау тӏэкӏу укъыспаплъэмэ, сыкӏони, къыпфэсхьыжьын.

Ерэкӏыжьи ары зыфаер, къадыри ащ фай, зэкӏэ лӏым къытын фэягъэм гуадзэ иӏэу ежь къызыӏэкӏигъэхьажьыщт.

- Хъунба, адэ, дэгъу, - ыӏуи, Хъуаджэр тахътэм тетӏысхьэжьыгъ, лӏыри икӏыгъ.

Ахъщахьэ кӏуагъэр къэмыкӏожьыхэ зэхъум, Хъуаджэм гуцаф ышӏи, къадым еупчӏыгъ:

- Арэп, къадыр, шъхьэшъоеом дышъэ сомэ ныкъуа ыуасэр?

- Сэ хэбзэнчъэу сызекӏорэп, - ыӏуагъ къадым.

- Ащыгъум дэгъу, къадыр, арэу узафэмэ, - ыӏуи, Хъуаджэр къадым екӏуалӏи, зэрэфэлъэкӏэу шъхьэфаоу еуи, кӏэраоу къытыридзагъ джэхашъом.

- Сэ сежэнэу игъо сифэщтэп, сшӏуабэ машӏэ, ау дышъэ сомэ ныкъор хьэолые мыхъуным пае, къыхьыжьмэ о къыӏыхыжь, сичӏыфэ о осэтыжьы, - ыӏуи, къадым ыпэ лъыр къичъэу джэхашъом къытырини, Хъуаджэр икӏыжьыгъ.