Бадий
– Бадий, губгъуэм укӏуэфынкъэ уэ?
Уемызэшу увэфынкъэ уэ?
– Хьэуэ!
Сиӏэщ уз емынэ:
Жьыбгъэм сыщошынэ.
– Бадий, жылэ тепсэфынкъэ уэ?
Е машинэ зепхуэфынкъэ уэ?
– Хьэуэ!
Сехьыр сэ си шхалъэм,
Сеукӏ сыздэпсалъэм.
– Бадий, хьэсэр къитхъ пщӏыфынкъэ уэ?
Жылэм ящӏэр пхуэщӏэфынкъэ уэ?
– Хьэуэ!
Щоункӏыфӏыкӏ си нитӏыр,
Фӏех, мэуз си куитӏыр.
– Бадий, фӏанэ пӏыгъыфынкъэ уэ?
Къабзэу хадэ упщӏэфынкъэ уэ?
– Хьэуэ!
Къыдэкӏащ си ӏэпщэр,
Схуэгъэхъейркъым си пщэр.
– Бадий, матэ зепхьэфынкъэ уэ?
Нартыху бэвыр дэпчыфынкъэ уэ?
– Хьэуэ!
Зэтречыр си щхьэр –
Си ӏэпкълъэпкъ нэхъыщхьэр.
– Бадий, шэмэдж бгъэбзэфынкъэ уэ?
Мэкъу аргъынэ къэпхьыфынкъэ уэ?
– Хьэуэ!
Къута мыгъуэщ си тхыр,
Арщ дохутырым схуитхыр.
– Бадий, мэз ущӏыхьэфынкъэ уэ?
Пхъэ гулъэфӏи къэпшэфынкъэ уэ?
– Хьэуэ!
Зэрыпкӏащ си шхулъэр,
Щӏэувэжкъым си лъэр.
– Бадий, баш къепхьэкӏыфынкъэ уэ?
Ди мэл гуартэр пхуэгъэхъункъэ уэ?
– Хьэуэ!
Сыдигъэкӏкъым си гум
Зэикӏ бгым и щыгум.
– Бадий, накӏуэ-тӏэ ефакӏуэ,
Уэ пщӏэ «Нащхъуэм» деж хьэщӏакӏуэ!
– Накӏуэ!
Дэнэ дыщефэнур?
Дапщэ дызэфэнур?