Къуртӏ щаитӏ
Матӏу ӏуэхугъуитӏкӏэ цӏэрыӏуэт: махъсымафэшхуэт, гушыӏэрейт.
Зы бадзэуэгъуэ махуэ гуэрым Матӏу бэзэрым кӏуауэ тетт. Сату ищӏу здэщытым зы хъыджэбз цӏыкӏу блэкӏырт:
– Махъсымэ!.. Махъсымэ!.. Пщӏыпщӏыжу махъсымэ бэлыхь хэт ефэн? – жиӏэрэ кӏийуэ.
– Ей, цӏыкӏуэ, уи махъсымэм дапщэ жыпӏэрэ? – щӏэупщӏащ Матӏу.
– Крушкӏэ – щаитӏ, дадэ!
– Нтӏэ, тӏыкӏуэ, ауэ думыгъэщӏ: къуртӏ къэс щаитӏ уэстынщ, зэрыкхъуэщыну сегафэ! – жиӏащ лӏыжьым.
Хъыджэбз цӏыкӏур гуфӏащ:
– Тхьэ, содэм, дадэ! – жиӏэри.
Матӏу ӏэ лъэныкъуэ кхъуэщыныр жьэдиубыдауэ йокъу «къуртӏ» лъэпкъи къэӏуркъым. Хъыджэбз цӏыкӏум и нэр триубыдауэ лӏыжьым и къурмакъей дыдэм йоплъ. Апхуэдэурэ Матӏу кхъуэщыныр щигъэщӏеижыпэм зэзакъуэ «къуррртӏ» жригъэӏащ.
Хъыджэбз цӏыкӏур махъсымэм и кӏэм щиплъэм:
– Теурэзыр къыхукӏуэ апхуэдэ къуртӏ! – жиӏэри къэнэщхъеящ.
– Умыгузавэ, цӏыкӏуэ! Сэ сыбдэгушыӏауэ аращ. Апхуэдэ напэтех сабийхэм иращӏэ хабзэ? Мэ уи ахъшэр! – Матӏу махъсымэ уасэм щӏигъуу иритащ.