«Сипцӏылъэ къыщысынагъ...»

«Хъуаджэр тхьагъэпцӏы, иакъыл зэкӏэми атекӏо аӏошъ, сегъэпцӏэшъумэ сеплъыщт», - ыӏуи тхьагъэпцӏ горэ ыуж къихьагъ.

Шыур къежьагъэу къызэрэкӏорэм икъэбар Хъуаджэм зэхихыгъ. Къызысыщт мафэри зэригъэшӏагъэ. Шыур къызэрыкӏын фэе лъэмыджым кӏуи, Хъуаджэр лъэмыдж цыпэ лъэныкъор зыӏыгъ нэпкъычӏэм чӏэуцуагъ. Нэпкъычӏэм егъэпкӏыгъэу щытызэ, шыур къэси, лъэмыджым къикӏыгъ.

- Хэтмэ уащыщ, сыд узыпэтыр? - ыӏуи шыур къеупчӏыгъ.

- Сы Хъуадж, - ыӏуагъ Хъуаджэм.

- Адэ, у Хъуаджэмэ, оры сэ сызлъыхъурэр, дэгъоу укъэзгъотыгъ, - ыӏуи шыур къепсыхыгъ.

- Адэ, сыд узыпэтыр, Хъуаджэ?

- Сызыпэтыр, - ыӏуагъ Хъуаджэм, - мы лъэмыдж цыпэр зыӏыгъ нэпкъыр къыгоункӏэ ежьагъ, кӏэгъакъо зыфэсшӏыгъэу сыщыт. Къуаджэм щыщ горэ къикӏыжьымэ сӏофытэни кӏэгъакъо къезгъахьын сэӏуи, сежэ сыщыт.

- Адэ сэ усилъэгъуныгъ, - ыӏуагъ шыум.

- Къаӏо уилъэгъун.

- Хъуаджэр тхьагъэпцӏы, ӏуш аӏо; зэпыты зэхъум, «сыкъегъапцӏэмэ сеплъын» сӏуи сыкъежьагъ. Джары силъэгъун.

- Ащыгъум, - ыӏуагъ Хъуаджэм, - сипцӏылъэ тадэжьы къысщыгъупшагъи, сыкӏожьыни къэсхьын, ащ симыплъэу укъызфэкӏуагъэм зи хэсшӏахьын слъэкӏыщтэп. Ау мыщ къыӏузгъэуцон горэ къекӏыжьыфэ укъысэмыжэ хъущтэп. Кӏэгъакъо гори къыдязгъэщын фае.

- Сыд пае зыгорэм упаплъэу ущытына, сэ сыкъыкӏэуцонгуи, кӏожьыри уилъэгъун къэлъэгъу. Нахь псынкӏэу укъызэрэсыжьынэу сишы ешэсыри кӏо, - ыӏуи лӏыр лъэшэу ишъыпкъэу нэпкъычӏэм зыригъэкӏызэ къыкӏэуцуагъ.

- Ари нахьышӏу, нахь псынкӏэу сыкъэсыжьын, - ыӏуи Хъуаджэр шым ешэси ӏукӏыжьыгъ.