Щобалэ и гуэдз гуэшыкӏэ
Ди къуажэр колхозу щызэгухьэ гъэ дыдэм гуэдз бэв къетхьэлӏат. Къэралым и хьэкъри зэфӏэдгъэкӏат. Абы иужькӏэ колхозхэтхэм я лэжьапщӏэр етын хуейтэкъэ?! А лъэхъэнэ дыдэм ирихьэлӏэу ди председателыр районым яшэри къулыкъу нэхъыщхьэ къратащ. Абы и пӏэкӏэ къытхуагъэкӏуащ Щауэкъарэ Щобалэ хъужыр.
– Гъавэр зэрыдгуэшыну вгъэхьэзыра? – бухгалтерыр къриджэри еупщӏащ ар.
– Шыбзыхъуэхэм я трудодень тӏэкӏур къытӏэрыхьэжмэ...
– Сыт трудодень? – Щобалэ бухгалтерым и псалъэр зэпиудащ. – Апхуэдиз бэлыхь дыхэмыту къуажэм дэс цӏыху къэс хуэзэу къэп зырыз яхуэдгуэшмэ, зэфӏэкӏакъэ?!
– Апхуэдэу пщӏымэ, трудодень нэхъыбэ зиӏэми, нэхъ мащӏэ зиӏэми, зэхуэдэу етын хуей хъунущ! Ар зыуэ...
Щобалэ бухгалтерым и псалъэр аргуэру зэпиудри:
– Советскэ и цӏыхухэр зэхуумыгъэдэну хэт уэ хуит узыщӏар? – щӏэупщӏащ.
– Етӏуанэрауэ, – жиӏащ бухгалтерым, – абы колхозым щымылажьэхэри хеубыдэ!..
– Хъарзынэкъэ-тӏэ?! Мылажьэхэр шхын щхьэкӏэ гъэлӏэн хуейуэ Советскэ властым къигъэуврэ? – председателым и нэщхъыр зэхиукӏащ.
– Абы нэмыщӏыжкӏэ къэп псори зэхуэдэкъым: зыр нэхъ цӏыкӏущ, адрейм апхуэдитӏ йохуэ! – дыщӏигъужащ бухгалтерым.
– Ар насыпырыхьщ!.. Дунейр къызэриухуэрэ къэпхэр зэхуэдэ зыхуэщӏа щыӏэкъым!.. Пщэдей щӏэвдзи гуэдзыр вгуэш!.. Сэ сщӏыр фи дежкӏэ унафэщ! – ткӏийуэ жиӏащ Щобалэ.
– Хьэуэ! Ар хъунукъым! – идакъым бухгалтерым.
– Хъунукъэ? – Щобалэ и наган кӏэрахъуэжьыр кърихри стӏолым къытрилъхьащ. – Уэ слъагъур увраг народ гуэру къыщӏэкӏынущ!
Сытыт къэнэжыр? Щобалэ унафэ зэрищӏам хуэдэу, гуэдзыр ягуэшащ. Ауэ абы иужькӏэ Щауэкъарэ Щобалэ ди колхозым председателу сыт хуэдизрэ щылэжьэжами фэри къывгурыӏуагъэнщ. Абы иужь дыдэу и наган кӏэрахъуэжьыр кърихри къэрал стӏолым трилъхьэжыгъащ.