Хъуаджэмрэ сэхъутэхэмрэ

Хъуаджэм ичэм хъуакӏо дифыгъэу, джау хэгъошъхьэ гъогу напцэм щигъэхъузэ, сэхъутэ шыу куп къакӏоу ылъэгъугъ. Шыухэр къызэсхэм, Хъуаджэр къашӏэжьи, сэлам къырахыгъ.

- Бэхъу апщи, Хъуаджэ!

- Тхьэшъуегъэпсэу! Шъуеблагъэх! - ыӏуи Хъуаджэр апэгъокӏыгъ.

Сэхъутэмэ тхьагъэпцӏ горэ ахэтыти, Хъуаджэм къехъоршэркӏынхэу агу къыгъэкӏыгъ.

- Теблэгъэщт, къэбар гомыӏуи отӏощт, - аӏуи сэхъутэхэр къепсыхыгъэх.

- Сыд къэбар шъуалъэныкъо щыӏ, шъо хэгъэгу шъукъекӏы? - ыӏуи Хъуаджэр яупчӏыгъ.

- Хъуаджэ, къэбар щыӏ, ау ущыгъуазэмэ тшӏэрэп нахь.

- Хьау, сэ зи къысэӏугъэп.

- Ошӏа, неущы дунаер кӏодыжьыщт, арыти тиныбджэгъухэр къызэдгъэлъэгъужьын тӏуи тыкъежьагъ.

- Олахьэ ар къэбар дэим, - ыӏуи Хъуаджэр епэгъогъохэу уцугъэ.

Сэхъутэ купмэ Хъуаджэм ичэмыбгъэ пщэр шӏуашхынэу агу къэкӏыгъ. Джары, къауахь-ауахьыжьэу къэбарыр къызкӏырагъэжьагъэр.

- Сыд тшӏэхэн адэ джы? - ыӏуагъ Хъуаджэр епэгъогъохызэ.

- Уичэмыбгъэ тэгъэшхыжьи, тызэрэжъугъэлъэгъужь, - аӏуагъ сэхъутэхэм.

- Хъун, неущы дунаер кӏодыжьыщт нэмыӏэмэ, чэмыр сыды сшӏыжьын, бэу шъуфэсыукӏын, шъозгъэшхын, - Хъуаджэр къезэгъыгъ.

Сэхъутэхэр къыӏуини, Хъуаджэр къыдэхьажьыгъ, лэгъупышхуи хьакъу-шыкъоу ищыкӏэгъэщти хэгъуашъхьэм дихыгъ.

Сэхъутэхэм затӏэкӏахьи, ӏэшэ-шъуашэхэр зэтралъхьи агъэӏылъыгъэх. Уанэхэр къатрахи шыхэри алъэхъагъэх.

Сэхъутэхэр еуцуалӏи, Хъуаджэм ичэм шӏуабзыгъ. Лыр зэӏахи лэгъупым изы ашӏыгъ, пхъэ хьажытӏэркъо чӏэсагъэхэм апалъагъ.

- Джы, кӏалэхэр, мэзым шъукӏуи, пхъэ къэшъухь, - ариӏуагъ Хъуаджэм.

«Хъуаджэм ичэмыбгъи хэдгъэфагъ, тэщ фэшъхьаф ар зыми ыгъэделэн ылъэкӏыгъэп», - аӏомэ, гушӏохэзэ, сэхъутэхэр мэзым чъагъэх.

Сэхъутэмэ пхъэ къаугъоифэ Хъуаджэр еуцуалӏи, шыу купмэ яӏэшэ-шъуашэхэр, онэ ӏапӏэхэр лэгъупым къырихьылӏагъ. Тыжьын къамэхэр, тыжьын бгырыпхыхэр, тыжьын сыхьатхэр, зэхиугъуаи пытэу ыгъэӏылъыгъэх. «Сэ сичэм ыуасэ ехъоу згъотыжьыгъэ, ау а ӏофым шъо шъухэделахьыгъэкӏэ шъусэгъэгугъэ» - ыӏуи Хъуаджэр еуцуалӏи онэпкъыхэр зэкӏэ лэгъупым кӏилъхьи машӏор зэхигъэнагъ, щыгъынэу къызщахыгъэхэр кӏилъхьэмэ, кӏакӏохэр пилъхьэзэ, машӏом кӏигъэстэу фежьагъ.

Сэхъутэхэр зэхицӏыцӏэу пхъэ ӏаплӏышхохэр аӏыгъэу къызӏохьажьыхэм, лэгъупым мэшӏошхо кӏэлъэу, лыр къажъоу алъэгъугъ.

- Хъуаджэ, мэшӏошхо пшӏыгъэу лыр огъажъо, пхъэр тыдэ къэпхыгъа? - аӏуи сэхъутэхэр къеупчӏыгъэх.

- Неущы дунаер кӏодыжьыщт нэмыӏэмэ, непи мыщ тыщызэхэсыжьыщтмэ, сыд ашӏыжьын сӏуи, уани шъуаши згъотыгъэр зэкӏэ зэхэсыугъуаий згъэстыгъэ, бэрэ пэмытэу лыр хьазыры хъущт, - ыӏуагъ Хъуаджэм.

- Aӏ-анасын, тыбгъэунэхъуи, къытэпшӏагъэр гъэшӏэгъоны, Хъуадж! - шыу купымэ агучӏэ изыгъ.

- Шъумыгумэкӏ, шъузэрафэежьын щыӏэп, неущы дунаер кӏодыжьыщт, - ыӏуи Хъуаджэр адэхьащхи, сэхъутэхэр шыкӏапцӏэмэ атесыхэу ытӏупщыжьыгъэх.