Зэшищымэ ядышъ

Мафэ горэм чылэ гъунэгъу къикӏыжьызэ, Хъуаджэр лӏы горэм ӏукӏагъ. Лӏыр лъэшэу нэшхъэй.

- О тхьэмэтэ маф, сенэгуе гугъу уиӏэкӏэ. Узыгъэгумэкӏырэр къаӏори, сишӏуагъэ окӏынкӏи мэхъу, - Хъуаджэм ыӏуагъ.

- Шъыпкъэ, Хъуаджэ, къэпшӏагъ. Сикъин осӏуати сшӏоигъу. Непэ къадым сиӏоф ыӏощт, сшъхьэ шӏуаригъэхынкӏэ щынагъо, - ыгу кӏодыгъапэу къыӏуагъ гъогурыкӏом.

- Адэ узэрагъэмысэрэр уихьакъа?

- Сихьакъэп!

- Зэрэхъурэмкӏэ, ухыеу пшъхьэ шӏуахыщт.

- Арба гухэкӏыр.

- Ухыемэ, зыуухыижьын плъэкӏыщт, амал зимыӏэ хъурэп. Къэӏуат къыохъулӏагъэр.

- Сэ ахэдзыгъэ хьазырэу чылэ гъунэм сыщыс. Егъашӏи цӏыф сиягъэ езгъэкӏыгъэп, ау сихыягъэ сытекӏодэжьы. Зы чэщ горэм тичылэ щыщ кӏэлэ пхъэшэ хьазырэу зэшищ садэжьы къыӏухьагъэх. «Ощ щэхъу цыхьэ фэтшӏэу мы чылэм дэсэп. Тэ зекӏо тежьагъ, дышъэу тиӏэр о къыотхьылӏагъ. Тидышъэ тфэбгъэӏылъы тшӏоигъу. Тыпсаумэ тыкъэкӏожьын, тыкъэкӏожьмэ, тидышъэ къытэптыжьын, ори улэупкӏэу уифэшъуашэр бгъотын» къысаӏуагъ. Етӏанэ къыпагъэхъожьыгъ: «Ау зы къыпфэдгъэпытэщт, тищи тызэмыгъусэу, тищэ ящанэ тхэмытэу дышъэм тыкъылъыкӏомэ, къытэптыщтэп». Джаущтэу дышъэр сагъэгъэтӏылъыгъэ, ежьхэри ягъогу техьагъэх. Бэ щышӏагъа-макӏэ щышӏагъа, ялъэгъун къагъэцэкӏагъэу зэшищыр къэкӏожьыхэзэ, хэгъуашъхьэм къызэсыжьыхэм, анахьыкӏэм ышнахьыжъхэм мырэу ариӏуагъ: «Тидышъэ псаумэ къызэзгъэшӏэн, тыкъызэрэсыжьыгъэри къесӏон, псы тӏэкӏуи сыкъешъон» ыӏуи. Анахьыкӏэр садэжь къыдахьи, къысиӏуагъ: «Тидышъэ джырэ нэс зэрэтфэпӏыгъыгъэмкӏэ тхьауегъэпсэу осӏонэу, пчыхьашъхьэ дышъэм сыкъызэрэлъыкӏощтыми ущызгъэгъозэнэу сшынахьыжъмэ сыкъыӏуагъэхьагъ. Узэхъырэхъышэрэ зыгорэкӏэ хэтмэ, морары сшынахьыжъхэри щытых, яупчӏыжь!» Сызэплъэм, зэриӏуагъэу, ышы-нахьыжъхэри щытых. Сыкъызалъэгъум, сэлам къысахэу шъхьащэ къысфашӏыгъ. Сэри шъхьащэ афэсшӏыжьи, ӏукӏыжьыгъэх.

Пчыхьэм кӏалэр къакӏуи, дышъэр ыхьыжьыгъ. Ыхьыжьыгъэр ӏофа, хэхьажьыгъ. Нахьыжъитӏумэ ашынахьыкӏэ амыгъотыжьы зэхъум, ӏофэу хъугъэм егуцафэхи, садэжь къэкӏуагъэх. Дышъэр ашынахьыкӏэ зэрестыжьыгъэр ясӏуагъ. Зэшитӏумэ ашынахьыкӏэ къызэригъэпцӏагъэхэр ыкӏи ащ зи зэрэпамыхыжьыщтыр кьагурыӏуи, сэ спахыжьырэр ашӏочарэу даокӏэ саужы къихьагъэх...

- Ар ӏофэп, - ыӏуагъ Хъуаджэм, - а узыхэфагъэм хыеу ухэсщыжьыщт. Гушӏуапкӏэр къэгъэхьазыр.

- Сыхэпщыжьымэ, сищыд остыщт, - ыӏуагъ гъогурыкӏом.

- Къадыр къызыоупчӏыкӏэ зэкӏэ еӏуат, ау ахъщэр зэряптыжьыгъэр емыӏу. «Нэбгырищыри къызэдакӏохэтмэ, яахъщэ ястыжьыщт. Ащыщ къэнагъэу адырэмэ ястыжьыщтэп. Джары тиӏуагъэр. Джар сымыгъэцэкӏэны сыфитэп» ӏори къыщыӏу.

Хъуаджэм зэриӏуагъэу лӏыр зекӏуагъэ, хыеуи хэкӏыгъ.