Хъуаджэр очыл

Кӏэлэ тхьамыкӏэ горэ щыӏагъ. Ащ ягъунэгъу шъузым кӏэнкӏэ жъогъипшӏ чӏыфэу къыӏихыгъ. Чӏыфэр ритыжьын ымылъэкӏызэ, илъэс тешӏагъ, ятӏонэрэри къыкӏэлъыкӏуагъ. Чӏыфэр римытыжьыхэ зэхъум шъузым кӏалэр хьыкумым ритыгъ.

Кӏэнкӏипшӏыр ипӏалъэм къызэрэримытыжьыгъэм къыхэкӏэу шъузым зэрарышхо ышӏыгъэу ыӏуагъ, зэрарэу ригъэшӏыгъэр къыпщыныжьынэу къедао: кӏэнкӏипшӏыр чэткъуртэм кӏилъхьэу чэтыжъые къыраригъэщыгъагъэемэ, ахэр чэты хъуныехэшъ, кӏэцӏыныехэшъ, гъолъхьанхи, чэтыжъыехэр къыращыжьыщтгъагъэ... Чэтипшӏ пчъагъ нахь, кӏэнкӏипшӏы къодыеп ащ зэрарэу къырихыгъэр!

Ӏофыр къадым зынэсым, кӏалэр Хъуаджэм дэжь кӏуи, еупчӏыжьыгъ, ӏэпыӏэгъу къыфэхъун ылъэкӏыщтмэ, къыфэхъунэу елъэӏугъ. Адрэри очыл къыфэхъунэу къыгъэгугъагъ.

Хьыкумашӏэм дэжь къыщызэрэугъоигъэхэу Хъуаджэм ежэх. Къэгужъо. Кӏалэри мэгумэкӏы, ар къэмыкӏомэ - иӏоф дэи, фэмыпщыныжьын къытыралъхьащт. Аузэ Хъуаджэр ӏуфэфыкӏэу къэсыгъ.

- Адэ, Хъуаджэ, чылэр къызэогъажэ, зыкъэогъэгужъо, - ыӏуагъ къадым рэзаджэу.

- Ашъыу, коц чылэпхъэ тӏэкӏу щыуанымкӏэ сэгъэгъути, сэ зэрэсымыӏоу кӏыхьэ-лыхьэ сшӏохъуи, тӏэкӏу сыкъэгужъуагъ, - къыриӏожьыгъ Хъуаджэм.

- Хъуаджэ, егъашӏи амыӏо горэ пӏощт нахь, коц чылапхъэр хэты егъэгъуи, коц гъэгъугъэри къэкӏына?! - ыӏуи, къадым цӏыфэу къырихьылӏагъэхэр Хъуаджэм дигъэхьащхыгъэх.

- Адэ, хьыкумашӏэр, коц гъэгъугъэр къэмыкӏыщтмэ кӏэнкӏэ жъуагъэм чэтыжъые хэкӏыжьэу о плъэгъугъа?! - ыӏуи, Хъуаджэр ӏыстыжьыгъэ.

Къадым ащ къыриӏолӏэжьын ыгъотыгъэп, шъузэу кӏэнкӏэ жъогъипшӏыр къезытыгъагъэми зиушъэфи, ӏукӏошъыжьыгъ.