Уэсмэн и фызышэ

Уэсмэн хъыджэбзаплъэ кӏуэрти, и ныбжьэгъу Хьэтӏиф здишащ. Уэсмэн фэрэкӏнапэт, Хьэтӏиф нэхъ щӏалэ бжьыфӏэт. Уэсмэн бэлэбанэт, Хьэтӏиф нэхъ зэгъэпэщат. Тӏури фызкъэмышэт.

Щӏалитӏыр здэкӏуа унагъуэм ирагъэблагъэри хъыджэбзыр кърагъэлъэгъуащ. Нэфми гу лъитэнт Уэсмэн плъакӏуэ зыхуэкӏуа хъыджэбзым Хьэтӏиф зэрехъуэпсам. Ауэ Хьэтӏиф къыщригъэжьэнур къыхуэгъуэтыртэкъым. Апхуэдэу щысурэ, хэгъэрейхэм щыщу щӏалэжь гуэрым Уэсмэн зыкъыхуигъэзащ:

– Мы ди пэшыр апхуэдэу щӏыӏэкъым, ныбжьэгъу, уи пыӏэжьынэр щхьэрых! – жиӏэри.

Хьэтӏиф зыхуей дыдэр аратэкъэ?! Къыпыгуфӏыкӏри:

– Уэлэхьи, пыӏэжьынэ умылъэгъуа уэ! Аддэ я гъуэлъыпӏэ къуапэм фӏэлъу къигъэна езым и пыӏэ къуацэжьыр плъэгъуатэмэ, сыкъэпщӏэнт. Мы щхьэрыгъыр хьэхуу сэ естауэ аращ! – жиӏащ Хьэтӏиф, хъыджэбзым зыхуигъэфэрыщӏурэ.

Уэсмэн гузавэри Хьэтӏиф и лъапэм теуващ. Абы щхьэкӏэ къимыгъанэу, Хьэтӏиф адэкӏэ пищащ:

– Тхьэмыщкӏэжь мыгъуэм и бгъэныщхьэ унэжь тӏэкӏури, къэуэн къудейуэ, лъэныкъуабэ хъуащ!.. Жэмыжь закъуэ иӏэти ари псэхэлӏэ хъури хьэм ирагъэшхыжащ...

Уэсмэн зыгуэр жиӏэну и жьэр иущӏат, ауэ хъыджэбзым япэ зыкъригъэщри Хьэтӏиф зыхуигъэзащ:

– Сощӏэ, щӏалэфӏ, уи пшынэм къибгъэкӏ къафэр зыхуэдэр, – жиӏащ абы. – Зи ныбжьэгъу апхуэдэу епцӏыжам, цӏыхухъурэ цӏыхубзу дунейм тету хъуар зэпэбж хъурэ сэ лейуэ сыкъэнами, сыдэкӏуэнкъым. Ауэ уэ хэутэн пщӏыну уи гугъа мо пыӏэжьынэм иджыпсту «накӏуэ» жиӏэмэ, сыхьэзырщ.

Хъыджэбзым жиӏа псалъэмакъым иужькӏэ, Хьэтӏиф и щхьэр къыфӏэхуащ, Уэсмэн и гур къызэрыгъуэтыжащ.

А пщыхьэщхьэм иужькӏэ зы тхьэмахуэ нэхъ дэмыкӏыу хъыджэбзыр фызышэшхуэу Уэсмэн къыхуашащ. Ауэ абы и фызышэм Хьэтӏиф хэтакъым.