«Джаущтэу пӏощт!..»

Хъуаджэм гъунэгъу бай горэ иӏагъ. Игъунэгъу иӏэм ычӏэ ымышӏэжьэу, ау блэкӏэу хьэрамэу щытыгъ. Хьакӏэ дахьэкӏэ, мэл миным хэӏабэу зы мэл фиукӏыщтыгъэп.

Арыти, игъунэгъу баим ешхъошӏэнэу Хъуаджэм ыгу къэкӏыгъ. Ежьи игъунэгъу дэжь кӏуагъэ.

- Сигъунэгъу, тичэмыбгъэхэр тэгъэукӏи тэгъэшхыжь, ау зыми етэмыгъаӏу. Ори «сичэм атыгъугъ» ӏо, сэри «сичэм атыгъугъ» сӏощт. Арымырымэ чылэр къыокӏуни, лыр пшӏуашхыжьыщт, - ыӏуагъ Хъуаджэм.

- Дэгъу дэдэу угу къэкӏыгъ, армырыми сэ сичэмыбгъэ сыукӏын сыгу хэлъыгъ, ау цӏыфмэ сшӏуамышхынэу зэрэсшӏыщтыр сымышӏэу ащ сигъапэщтыгъ, - ыӏуи гъунэгъу баири гушӏуагъэ.

Мэфэ зытӏу тешӏагъэу, игъунэгъу баим ичэмыбгъэ пщэр къыфи Хъуаджэм ыукӏыгъ. Ежь ичэми ыукӏи, лыр зэхигъэкӏухьагъ. Ныбджэгъоу иӏэр къырищалӏи щигъэшхагъэх, афэшхыщтым шъхьасыгъэп. Лэу къэнагъэр ыбзи, ыщыуи ыгъэгъунэу онджэкъым пилъагъ.

Гъунэгъур дэсыгъэпти къызэсыжьым, ибылымхэм чэмыбгъэр къащыкӏагъ.

Гъунэгъур къежьи, Хъуаджэм дэжь къэкӏуагъ.

- Хъуаджэ, къэбар ошӏа? - ыӏуи къеупчӏыгъ.

- Сыд?

- Сичэмыбгъэ атыгъугъ.

- Ары, ары, джаущтэу пӏощт, - ыӏуагъ Хъуаджэм.

- Хьау, сишъыпкъэу сэӏо, сичэм атыгъугъ...

- Адэ, уишъыпкъэу пӏощт, арымырымэ ашӏошъы хъунэп ныӏа, уафытемыкӏ, «атыгъугъ пӏощт», - ыӏуи Хъуаджэм гъунэгъу баир ытӏупщыжьыгъ.