«Лэгъупыр хъушъэн икӏодагъ...»

Мафэ горэм Хъуаджэр игъунэгъумэ адэжь кӏуи, хьафэу лэгъупышхо къыхьыгъ. Зыфэяхэм, ежьыми лэгъупыжъые горэ иӏэти лэгъупышхом ыкӏоцӏ ригъэуцуи ыхьыжьыгъ.

- Сыда адэ, мы лэгъупыжъыер къызыкӏыдэпхьыгъэр, Хъуадж? - аӏуи къеупчӏыгъэх.

- Сэ симые сыфаеп, шъуилэгъупышхо илъфэгъу дэдэу къысэшъутыгъагъэти, хъушъэны ихьи лэгъупыжъые къылъфыгъ, былымыр зыер шъорыти къыдэсхьыжьыгъ.

- Тхьэ къытати, тилэгъупышхо лъфи, лэгъупыжъые къылъфыгъ, - аӏуи быныр гушӏуагъэ.

Лэгъупышхори лэгъупыжъыери игъунэгъумэ ӏахыжьыгъэх.

Бэ тешӏагъа, макӏэ тешӏагъа, етӏани Хъуаджэр кӏуи лэгъупышхор хьафэу къыхьыгъ. Ымыхьыжьыхэ зэхъум, игъунэгъу къэкӏуагъ.

- Адэ Хъуаджэ сыдэу бэрэ лэгъупыр къэбгъэтыгъа?

- Ярэби, къысфаӏорэп, ау хъугъэр гукъау: шъуилэгъупышхо хъушъэны икӏодагъ, - ыӏуагъ Хъуаджэм.

- Сыдэу хъушъэны икӏуадэу? Лэгъупыр лӏэна, Хъуаджэ? - ыӏуагъ игъунэгъу ыгъэшӏагъоу.

- Ар сыдэу о бгъэшӏагъора? Лэгъупыр зылъфэкӏэ лӏэнкӏэ гъэшӏэгъона? - ыӏуагъ Хъуаджэм.

Игъунэгъу ыӏон ымышӏэу ӏукӏыжьыгъ. Джаущтэу лэгъупыжъыем ычӏыпӏэкӏэ лэгъупышхор Хъуаджэм къыфэнагъ.