ໂຄວິດ-19
ໂຄວິດ-19 [코윗 십까오]
2019년 중국에서 발병한 신종 코로나 바이러스
ເຊື້ອຈຸລະໂລກໂຄໂຣນາສາຍພັນໃໝ່ [쓰아쭈라록 코로나 싸이판 마이] 신종 병원체 코로나 바이러스
(ຮ່າງ) ຄຳສັ່ງ ວ່າດ້ວຍມາດຕະການເພີ່ມເຕີມໃນການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງ ພະຍາດ ອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່ (COVID-19)
ເຖິງ: - ບັນຕາທ່ານລັດຖະມົນຕີ, ຫົວໜ້າອົງການລັດທຽບເທົ່າກະຊວງ, ເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ໃນຂອບເຂດທົ່ວປະເທດ
- ພະນັກງານ, ລັດຖະກອນ, ທະຫານຕຳຫຼວດ, ປະຊາຊົນບັນດາເຜົ່າ ໃນທົ່ວປະເທດ.
- ອິງຕາມກົດໝາຍວ່າດ້ວຍລັດຖະບານ (ສະບັບປັບປຸງ) ເລກທີ 04/ສພຊ, ລົງວັນທີ 08 ພະຈີກ 2016,
ສະພາບການແຜ່ລະບາດຂອງເຊື້ອພະຍາດ COVID-19 ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ກວມເອົາເກືອບທຸກປະເທດໃນໂລກ, ຈຳນວນຜູ້ຕິດເຊື້ອ ແລະ ຜູ້ເສຍຊີວິດຈາກພະຍາດ ດັ່ງກ່າວ ແມ່ນເພີ່ມຂຶ້ນທຸກມື້ ແລະ ປະຈຸບັນ ຍັງບໍ່ທັນມີຢາປິວພະຍາດດັ່ງກ່າວ. ຢູ່ ສປປ ລາດ, ເຖິງແມ່ນວ່າ ຜ່ານມາ ລັດຖະບານ ໄດ້ມີມາດຕະການ ປ້ອງກັນ ແລະ ຮັບມືກັບການລະບາດຂອງ ພະຍາດ COVID-19 ແຕ່ກໍ່ມີຜູ້ຕິດເຊື້ອພະຍາດດັ່ງກ່າວແລ້ວ, ສະນັ້ນ ເພື່ອເປັນການ ປ້ອງກັນ, ສະກັດກັ້ນ ແລະ ຮັບມືກັບການລະບາດຂອງພະຍາດ COVID-19 ບໍ່ໃຫ້ແຜ່ລາມອອກໄປໄວ ແລະ ເປັນ ວົງກວ້າງ, ພ້ອມທັງເພື່ອເປັນການສ້າງເງື່ອນໄຂ ໃຫ້ແກ່ຄະນະສະເພາະກິດເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໄດ້ກວດກາຕິດຕາມ ກຸ່ມສ່ຽງໃນການຕິດເຊື້ອ ແລະ ກະກຽມຄວນພ້ອມຮອບດ້ານ ເພື່ອຮັບມືກັບສະພາບທີ່ອາດມີການປ່ຽນແປງໃນຕໍ່ໜ້າ.
ນາຍົກລັດຖະມົນຕີ ອອກຄຳສັ່ງ:
ໃຫ້ບັນດາກະຊວງ, ອົງການລັດທຽບເທົ່າກະຊວງ ແລະ ອົງການປົກຄອງທ້ອງຖິ່ນ ໃນຂອບເຂດທົ່ວປະເທດ ຈັດຕັ້ງເຮັດວຽກຢູ່ເຮືອນ ຜ່ານລະບົບອອນລາຍ, ປຶກສາຫາລື ທາງໂທລະສັບ, ແຕ່ໃຫ້ມີການຈັດຕັ້ງໝູນວຽນ ປະຈຳການໃນຈຳນວນທີ່ເໜາະສົມ ຕັ້ງແຕ່ວັນທີ 1-19 ເມສາ 2020.
ຫ້າມບໍ່ໃຫ້ປະຊາຊົນ, ພະນັກງານ, ລົດຖະກອນ ອອກຈາກເຮືອນ, ທີ່ພັກອາໃສຂອງຕົນ ຕັ້ງແຕ່ວັນທີ 1-19 ເມສາ 2020 ຍົກເວັ້ນ ທີ່ຕ້ອງອອກໄປຊື້ອາຫານ ແລະ ຂອງໃຊ້ຈຳເປັນ, ໄປໂຮງໝໍ, ຄລີນິກ ຫຼື ໄປປະຈຳການ ຢູ່ສຳນັກງານ, ອົງການ ສະເພາະ ພາກສ່ວນທີ່ໄດ້ຮັບອະນຸຍາດ ໃຫ້ເປິດດຳເນີນການ.
ໃຫ້ຢຸດຢ່າງເດັດຂາດ ກິດຈະກຳທີ່ມີຄວາມສ່ຽງຕໍ່ການຕິດເຊື້ອ ເນື່ອງຈາກມີຄົນເຂົ້າຮ່ວມຈຳນວນຫຼາຍ ເປັນຕົ້ນ ງານບຸນປະເພນີ ລວມທັງການສົງນໍ້າພະໃນໄລພຍບຸນປີໃໝ່ລາວ ຄສ 2563, ກິດຈະກຳທາງສາສະໜາ, ງານດອງ, ງານລ້ຽງສັງສັນຕ່າງໆ: ສຳລັບງານສົບ, ງານສົ່ງສະການ ໃຫ້ເຮັດຢ່າງຈຳກັດ ແລະ ໃຫ້ປະຕິບັດມາດຕະການຢູ່ຫ່າງກັນ ແລະ ໃສ່ຜ້າປິດປາກ-ດັງ ຢ່າງເຂັ້ມງວດ.
ບັນດາກິດຈະການ ທີ່ໃຫ້ສືບຕໍ່ເປີດດຳເນີນການ ມີ : ໂຮງໝໍ, ສູນການແພດ, ຄລີນິກ, ຮ້ານຂາຍຢາ, ທະນາຄານ, ສະຖາບັນການເງິນ, ຕະຫຼາດຫຼັກຊັບ, ກິດຈະການກ່ຽວກັບຫຼັກຊັບ, ຕະຫຼາດ, ຮ້ານຂາຍເຄື່ອງຍ່ອຍ, ຊຸບເປິດມາເກັດ, ປໍ້ານໍ້າມັນ, ໂຮງແຮມ ສະເພາະທີ່ເປິດໃຫ້ບໍລິການທີ່ພັກ ; ສະເພາະຮ້ານອາຫານ, ຮ້ານກາເຟ ເປີດໃຫ້ ບໍລິການໄດ້ສະເພາະ ໃຫ້ຊື້ກັບບ້ານ ຫຼື ສຳລັບສົ່ງ ອາຫານ ຕາມສັ່ງ. ສະຖານທີ່ດັ່ງກ່າວທີ່ອະນຸຍາດໃຫ້ເປີດນັ້ນ ຕ້ອງປະຕິບັດ ມາດຕະການປ້ອງກັນ ທີ່ຄະນະສະເພາະກິດວາງອອກຢ່າງເຂັ້ມງວດ (ເປັນຕົ້ນ ການກວດອຸນຫະພູມ, ໃສ່ຜ້າປິດປາກ-ດັ້ງ, ລ້າງມື ໃຫ້ສະອາດດ້ວຍສະບູ, ເຈລ ແລະ ນໍ້າຢາຂ້າເຊື້ອ, ມີໄລຍະຫ່າງທີ່ປອດໄພ ຢູ່ຫ່າງກັນ ຢ່າງໜ້ອຍ 1 ແມັດ, ອະນາໄມສະຖານທີ່...)
ຫ້າມບໍ່ໃຫ້ມີການເຄື່ອນຍ້າຍເດີນທາງອອກນອກແຂວງຂອງບຸກຄົນ ຢູ່ແຂວງທີ່ມີຜູ້ຕິດເຊື້ອພະຍາດ COVID-19 ຈົນຮອດ ວັນທີ 19 ເມສາ 2020. ຍົກເວັ້ນການຂົນສົ່ງສິນຄ້າ ແຕ່ ໃຫ້ເຈົ້າໜ້າທີ່ ຕັ້ງດ່ານກວດກາຢ່າງເຂັ້ມງວດ.
ໃຫ້ໂຈະການດຳເນີນກິດຈະການຂົນສົ່ງສາທາລະນະຢູ່ພາຍໃນແຂວງ ແລະ ນະຄອນຫຼວງວຽງຈັນ ຊົ່ວຄາວ ຕັ້ງແຕ່ ວັນທີ 1-19 ເມສາ 2020 ເພື່ອຫຼຸດຜ່ອນຄວາມສ່ຽງໃນການຕິດເຊື້ອພະຍາດ.
ຫ້າມບໍ່ໃຫ້ມີການກັກຕຸນສິນຄ້າ, ສວຍໂອກາດຂຶ້ນລາຄາສິນຄ້າ ໂດຍສະເພາະສິນຄ້າຄວບຄຸມ (ຜ້າປິດປາກ-ດັງ ໃຫ້ເຈົ້າໜ້າທີ່ການຄ້າ ຕິດຕາມກວດກາ ແລະ ຄຸ້ມຄອງລາຄາສິນຄ້າຢ່າງເຂັ້ມງວດ, ພ້ອມກັນນີ້ ໃຫ້ສົມທົບກັບ ເຈົ້າໜ້າທີ່ຕຳຫຼວດ ດຳເນີນມາດຕະການຕໍ່ຜູ້ລະເມີດຢ່າງເດັດຂາດ.
ຫ້າມອອກຂ່າວ ຫຼື ເຜີຍແຜ່ຂໍ້ມູນທີ່ບໍ່ມີຄວາມຈິງ, ຂໍ້ມູນປອມ ກ່ຽວກັບພະຍາດໂຄວິດ 19 ທີ່ອາດເຮັດ ໃຫ້ປະຊາຊົນ ເຂົ້າໃຈຜິດ, ສ້າງຄວາມປັ່ນປ່ວນ ແຕກຕິ່ນ ໃນສັງຄົມ. ຖ້າຜູ້ໃດລະເມີດ ຈະຖືກດຳເນີນການ ຕາມລະບຽບກົດໝາຍ. ມອບໃຫ້ໜ່ວຍງານຕິດຕາມ ກວດກາ ແລະ ຕ້ານຫາງສຽງທີ່ບໍ່ດີໃນສັງຄົມ ຕິດຕາມ ແລະ ດຳເນີນມາດຕະການ ຢ່າງເຂັ້ມງວດ.
ມອບໃຫ້ອຳນາດການປົກຄອງບ້ານ, ກອງຫຼອນ, ແນວລາວສ້າງຊາດ, ອົງການຈັນຕັ້ງມະຫາຊົນ ເຝົ້າລະວັງ ແລະ ຕິດຕາມກວດກາ ການກັກຕົນເອງຂອງຜູ້ທີ່ມາຈາກຕ່າງປະເທດ. ລວມທັງຜູ້ທີ່ຕິດພັນກັບຜູ້ທີ່ຕິດເຊື້ອພະຍາດ ພ້ອມທັາງປະສານສົມທົບກັບພາກສ່ວນທີ່ກ່ຽວຂ້ອງເຜີຍແຜ່ຂໍ້ມູນກ່ຽວກັບການປ້ອງກັນຕົນເອງຈາກພະຍາດ ດັ່ງກ່າວ.
ມອບໃຫ້ເຈົ້າໜ້າທີ່ຕຳຫຼວດ, ທະຫານ, ຕິດຕາມກວດກາການປະຕິບັດມາດຕະການເພິ່ມເຕີມນີ້ ລວມທັງ ມາດຕະການທີ່ໄດ້ວາງອອກຜ່ານມາແລ້ວນັ້ນ ແລະ ໃຫ້ດຳເນີນມາດຕະການທາງກົດໝາຍ ຕໍ່ຜູ້ທີ່ລະເມີດ ຫຼື ກະທຳຜິດ ຢ່າງເຂັ້ມງວດ. ພ້ອມກັນນີ້ ໃຫ້ຕິດຕາມກວດກາ ຕາມຈຸດຕ່າງໆ ບໍ່ໃຫ້ມີການຊູມນຸມ, ມົ້ວສຸມທີ່ພາໃຫ້ມີຄວາມສ່ຽງ ຕໍ່ການຕິດເຂື້ອ ແລະ ປະຕິບັດໜ້າທີ່ຮັບຜິດຊອບຂອງຕົນ ເພື່ອຮັບປະກັນຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ.
ໃຫ້ຄະນະສະເພາະກິດອອກມາດຕະການແນະນຳຢ່າງລະອຽດ ໃນຮູບແບບທີ່ເຂົ້າໃຈງ່າຍ ເພື່ອເຜີຍແຜ່ຜ່ານສື່ທາງການ, ຜ່ານເວັບໄຊ www.COVID19.gov.la ແລະ ໃຫ້ພາກສ່ວນທີ່ກ່ຽວຂ້ອງນຳໄປເຜີຍແຜ່ ຢູ່ບ້ານ ທີ່ມີຄວາມສ່ຽງ ແລະ ບ້ານທີ່ມີການເຝົ້າລະວັງການຕິດເຊື້ອ.
ໃຫ້ບັນດາກະຊວງ, ອົງການລັດທຽບເທົ່າກະຊວງ, ອົງການປົກຄອງທ້ອງຖິ່ນ, ພາກສ່ວນທີ່ກ່ຽວຂ້ອງ, ພະນັກງານ, ລັດຖະກອນ, ທະຫານ, ຕຳຫຼວດ, ປະຊາຊົນບັນດາເຜົ່າໃນທົ່ວປະເທດ ຈົ່ງຮັບຮູ້ໃຫ້ການຮ່ວມມື ແລະ ຈັດຕັ້ງປະຕິບັດຄຳສັ່ງສະບັບນີ້ ຢ່າງເຂັ້ມງວດ ແລະ ໄດ້ຮັບຜົນດີ.
ຄຳສັ່ງສະບັບນີ້ ມີຜົນສັກສິດ ນັບແຕ່ມື້ລົງລາຍເຊັນເປັນຕົ້ນໄປ.
ນາຍົກລັດຖະມົນຕີ