La directora de Torisme de Catalonha, Marian Muro, visite era Val d'Aran convidada peth Conselh Generau d'Aran

Fecha de publicación: 14-ene-2012 12:53:54

Dimèrcles, 11 de Gèr de 2012

Marian Muro, directora de Torisme de Catalonha, a passat uns dies ena Val d’Aran convidada peth Govèrn deth Conselh Generau d’Aran. Pendent era sua estada, Muro, qu’anaue acompanhada per Xavier Espasa, director dera Agència Catalana de Turisme, mostrèc era plia disposicion deth Govèrn dera Generalitat de Catalunya, d’arribar a acòrds damb eth Govèrn d’Aran, entà trabalhar amassa ena promocion especifica deth territòri d’Aran coma destin toristic de prumèra qualitat.

Era directora de Torisme de Catalonha, siguec recebuda peth sindic d’Aran Carlos Barrera e pera conselhèra de Torisme deth Conselh Generau d’Aran, Anna Díaz.

Eth sindic d’Aran, Carlos Barrera, demanèc qu’eth Conselh Generau d’Aran age representacion a compdar d’ara ena Agència Catalana de Turisme, perquè didec “ei a on se planifiquen es accions toristiques de tot Catalonha”.

En tot hèr referéncia ara recentament encetada sason d’iuèrn, Barrera soslinhèc que segontes informes de Baqueira Beret, pendent es dies de Nadau, s’a constatat qu’eth 40% d’esquiadors sigueren persones que visitaven per prumèr còp era Val d’Aran, e qu’en un nombre molt elevat, sigueren visitants que dempús d’uns quants ans sense passar eth Nadau ena Val d’Aran, an decidit tornar-i. Barrera remerquèc eth naut nivèl de satisfaccion d’aguesti visitants.

En çò que hè ara taxa toristica que vò implantar eth Govèrn dera Generalitat, eth sindic d’Aran, expliquèc qu’aguesta s’aplicarà en tot Catalonha e que representarà un modèl equitatiu entà toti es territòris. Entà Barrera, son es empresaris es qu’an d’èster competitius, mentre qu’es administracions an de vetlar peth bon foncionament des infrastructures e proporcionar es supòrts de besonh as empresaris d’un sector tant sensible com eth toristic. Barrera expliquèc qu’era aplicacion dera taxa, ei un tèma qu’ara madeish eth Govèrn dera Generalitat debatís damb tot eth sector, e qu’atau se transmeterà tanben a toti es empresaris dera Val d’Aran.

Totun açò eth sindic d’Aran volec remercar qu’es ingrèssi procedents dera taxa pòden servir entà milhorar era qualitat dera Val d’Aran coma destin toristic, entà arribar a naus mercats e entà tier ua major projeccion. Entà Carlos Barrera, era taxa non aurie de méter nerviosi as representants deth sector, en tot rebrembar qu’en destins toristics de referéncia coma pòden èster Londres, Paris, quaqui païsi de Sudamerica e es madeishi Estats Units de Nordamerica, ja hè molti ans qu’es toristes paguen ua taxa per pernoctacion.

Era directora de Torisme de Catalonha, Marian Muro, profitèc era sua estada en Aran, entà visitar es installacions dera estacion d’esquí de Baqueira Beret, es Oficines de Torisme Val d’Aran, eth Musèu Etnologic, e mantier diuèrses reünions de trabalh damb er alcalde de Naut Aran, César Ruíz Canela, e eth director generau de Baqueira Beret, Aureli Bisbe, entre d’auti.

http://www.conselharan.org/index.php?option=com_content&task=view&id=1394&Itemid=1