Mester de Clerecía. Libro de Aleixandre
El libro de Alexandre (fragmento)
1 Sennores se quisierdes mi servicio prender,
querria-vos de grado servir de mi mester;
deve de lo que sabe ome largo seer,
si non podrie en culpa e en riebto caer.
2 Mester traygo fermoso non es de ioglaria
mester es sen pecado, ca es de clerecía:
fablar curso rimado por la quaderna via,
a silavas cuntadas, ca es grant maestria.
3 Qui oir lo quisier, a todo mio creer,
avra de mí solaz, en cabo grant plazer,
aprendra bonas gestas que sepa retraer,
averlo an por ello muchos a conocer.
4 Non uos quiero grant prologo nen grandes novas fazer,
luego a la materia me vos quiero coger;
el Crïador nos dexe bien apresos seer,
si en algo pecarmos, Él nos denne valer.
5 Quiero leer un libro de un rey noble, pagano
que fue de grant esforçio, de coraçon loçano
conquisto tod’el mundo, metiól’ so su mano;
terne si lo conpliere, que soe bon escrivano.