इही मतौ ठहराइये, अली हमारे जान।
जान न दीजै कान्ह कौं, जान दीजिए जान।।56।।
सब दरदन की ज्यौं दवा, जग मैं बिधि कर हीन।
बेदरदी महबूब की, काहे खोइ न दीन।।57।।
जसुमति या ब्रज मैं कहौ, अब निबाह क्यौं होइ।
तब दधि चोरी होत ही, अब चित चोरी होइ।।58।।
सुध त रही देखतु रहै, कल न लखै बिन तोहिं।
देखै अनदेखै तुहै, कठिन दुहूँ बिधि मोहिं।।59।।
नींद दुहुन के दृगन मैं, सकै नपल ठहराई।
जो चोरी कौ फिरत है, जिहि चित चोरो जाइ।।60।।
मटकी मटकी सीस धर, चल कछु बकि मुसकाइ।
लखि वह घट की सुध गई, छवि अँटकी दृग आइ।।55।।
निरख छबीले लाल कौ, मन न रहौ मो हाथ।
बँधौ गयौ ता बसि भयौ, छबी-दान के साथ।।54।।
को अवराधे जोग तुव, रहु रे मधुकर मौन।
पीताम्बर के छोर तैं, छौर सकै मन कौन।।53।।
उड़ौ फिरत जो तूल सम, जहाँ तहाँ बेकाम।
ऐसे हरुये कौ धरयो, कहा जान मन नाम।।52।।
मन मैला मन निरमला, मन दाता मन सूम।
मन ज्ञानी अज्ञान मन, मनहि मचाई धूम।।51।।