अथ राग बसन्त / दादू ग्रंथावली / दादू दयाल

371. परिचय। षड्ताल

मोहन माली सहज समाना, कोई जाणे साधु सुजाना॥टेक॥

काया बाड़ी माँहीं माली, तहाँ रास बनाया।

सेवक सौं स्वामी खेलन को, आप दया कर आया॥1॥

बाहर-भीतर सर्व निरंतर, सब में रह्या समाई।

परकट गुप्त गुप्त पुनि परकट, अविगत लख्या न जाई॥2॥

ता माली की अकथ कहाणी, कहत कही नहिं आवे।

अगम अगोचर करत अनंदा दादू यह यश गावे॥3॥

370. परिचय सुख वर्णन। षड्ताल

तहँ खेलूँ पीव सूँ नितही फाग, देख सखीरी मेरे भाग॥टेक॥

तहँ दिन-दिन अति आनन्द होइ, प्रेम पिलावे आप सोइ।

संगियन सेती रमूँ रास, तहँ पूजा-अरचा, चरण पास॥1॥

तहँ वचन अमोलक सब ही सार, तहँ बरते लीला अति अपार।

उमंग देह तब मेरे भाग, तिहिं तरुवर फल अमर लाग॥2॥

अलख देव कोई जाणे भेव, तहँ अलख देव की कीजे सेव।

दादू बलि-बलि बारंबार, तहँ आप निरंजन निराधार॥3॥

369. परिचय प्राप्ति। कड़डुक ताल

बहुरि न कीजे कपट काम, हृदय जपिये राम नाम॥टेक॥

हरि पाखें नहिं कहूँ ठाम, पीव बिन खड़भड़ गाँव-गाँव।

तुम राखो जियरा अपनी माँम, अनत जिन जाय रहो विश्राम॥1॥

कपट काम नहिं कीजे हांम, रहु चरण कमल कहु राम नाम।

जब अंतरजामी रहै जांम, तब अक्षय पद जन दादू प्राम॥2॥

368. उपदेश। एक ताल

मेरे मोहन मूरति राख मोहि, निश वासर गुण रमूँ तोहि॥टेक॥

मन मीन होइ ज्यों स्वाद खाइ, लालच लागो जल थैं जाइ।

मन हस्ती मातो अपार, काम अंध गज लहे न सार॥1॥

मन पतंग पावक परे, अग्नि न देखे ज्यों जरे।

मन मृगा ज्यों सुने नाद, प्राण तजे यूँ जाइ बाद॥2॥

मन मधुकर जैसे लुब्ध वास, कमल बँधावे होइ नास।

मनसा वाचा शरण तोर, दादू का राखो गोविन्द मोर॥3॥

367. मन स्थिरार्थ विनती। एक ताल

मोहन दुख दीरघ तूं निवार, मोहि सतावे बारंबार॥टेक॥

काम कठिन घट रहै माँहिं, ताथैं ज्ञान ध्यान दोउ उदय नाँहिं।

गति मति मोहन विकल मोर, ताथैं चित्त न आवे नाम तोर॥1॥

पांचों द्वन्द्वर देह पूरि, ताथैं सहज शील सत रहैं दूरि।

शुद्ध बुद्धि मेरी गई भाज, ताथैं तुम विसरे (हो) महाराज॥2॥

क्रोध न कबहूँ तजे संग, ताथैं भाव भजन का होइ भंग।

समझि न काई मन मंझारि, ताथैं चरण विमुख भये श्री मुरारि॥3॥

अन्तरयामी कर सहाइ, तेरो दीन दुखित भयो जन्म जाइ।

त्राहि-त्राहि प्रभु तूं दयाल, कहै दादू हरि कर सँभाल॥4॥

366. करुणा विनती। तेवरा ताल

तूं घर आवने म्हारे रे, हूँ जाउँ वारणे ताहरे रे॥टेक॥

रैन दिवस मूने निरखताँ जाये,

वेलो थई घर आवे रे वाहला आकुल थाये॥1॥

तिल तिल हूँ तो तारी वाटड़ी जोऊँ,

एने रे आँसूड़े वाहला मुखड़ो धोऊँ॥2॥

ताहरी दया करि घर आवे रे वाहला,

दादू तो ताहरो छे रे मा कर टाला॥3॥

365. विरह। धीमा ताल

निर्मल नाम न लीयो जाइ, जाके भाग बड़े सोई फल खाइ॥टेक॥

मन माया मोह मद माते, कर्म कठिन ता माँहिं परे।

विषय विकार मान मन माँहीं, सकल मनोरथ स्वाद खरे॥1॥

काम-क्रोध ये काल कल्पना, मैं मैं मेरी अति अहंकार।

तृष्णा तृप्ति न माने कबहूँ, सदा कुसंगी पंच विकार॥2॥

अनेक जोध रहै रखवाले, दुर्लभ दूर फल अगम अपार।

जाके भाग खड़े सोई फल पावे, दादू दाता सिरजनहार॥3॥

364. भजन भेद। मल्लिका मोद ताल

(गायन समय प्रभात 3 से 6 तथा बसन्त ऋतु)