Biografia en occitan

Marineta Mazoyer es nascuda a Lanjac. Sa familha es sortida de Gard e d'Ardecha, mas parlan pas occitan a l'ostau. Passa sa joinessa en Alès, dins lo barri de Ròchabèla que s'i entend parlar la lenga per los minaires. Maridada en 1960 e partida a París, i es mestressa d'escòla pendent 15 ans. Nomenada en 1978 a Mazac (St Privat de Vièlh), pren consciéncia de la lenga del país qu'es un pauc demorada presenta en ela. De corses per correspondéncia per lo Collègi d'Occitania de Tolosa li permeton d'aquesir l'escrich e en 1995 un cors sus plaça, li permet de passar a l'oral. Tre 1998 l'associacion "Lenga e cacalàs" es creada e demòra, per un talhièr de 2 oras per setmana. Es lèu la debuta de l'escritura en poèmas qu'obtenon de prèmis (un cinquantenat) per de luòcs divèrses d'Occitania. Es una revelacion e l'afogament per escriure li ven primordial. En 2001, retirada, s'inscriu a la Facultat de Montpelhièr (Licéncia d'occitan e Master de Lengas Romanas) e aprigondís sas coneissenças de la lenga e de la cultura occitanas.

Dempuèi : una dotzena de libres per adults son publicats : poesia, antologia d'autors occitans a l'entorn d'Alès,racontes autobiografics, novèlas, roman joinessa, biografia d'una felibressa d'Alès. De contes per enfants son escriches e illustrats per l'autora : 18 a l'ora d'ara Totes los libres son bilingües : occitan-francés.

L'autora participa a las ràdios localas (Grasilha Dobèrta e Inter-Val) e regionala : ràdio Lenga d'òc. Activa dins mantunas associacions de patrimòni de Cevenas, de Gard, d'Ardecha, de Losera, sa tòca essenciala es de promòure la lenga e la cultura occitanas e de las transmetre dins un temps que la màger part del mond comprenon encara la lenga, la parlan de còps, e lor fan mestièr d'aprene de la legir e de l'utilizar.

Siti de l'autora aquí.