Biografia en occitan

Pèire THOUY es nascut a Castras e viu a Vabre, a Lengadòc Naut.Lèu afogat de natura, s’endralhèt cap a d’estudis scientifics (a Tolosa puèi MontPelhièr) en biologia, geologia, ecologia. Apuèi, partiguèt al Marròc pendent 12 ans coma ensenhaire e cercaire en ornitologia e mamalogia. Tornat al país, començèt d’estudis literaris (istòria, occitan, catalan, arab) e jamai arrestèt d’ensenhar l’occitan a de joves e d’adultes.

A portat la lenga d’òc dins lo domèni scientific, comunicant a de collòquis ornitologics internacionals (Barcelona, Albi…) e participant a fòrça d’òbras tant occitanas coma francesas (Atlàs dels Vertebrats de l’Avairon, dels Mamifèrs de Miègjorn-Pirenèus, de França, Lo Libre dels Ausèls, Quasèrns tecnics del PNR de Lengadòc Naut, Flòras…). Es vengut un referent per la nomenclatura animala. Sempre militant per la socializacion de la lenga, a escrich pels seus corses e aprèp d’eveniments fòrts, e tanben revirat en occitan Sidobruga, un libre de poèmas sul seu país de Sidòbre, de granit e de legendas.