श्री अन्नपूर्णास्तोत्रम्
Embedded Files
नित्यानंदकरी वराभयकरी
सौन्दर्यरत्नाकरी,
निर्धूताखिलघोरपावनकरी
प्रत्यक्षमाहेश्वरी।
प्रालेयाचलवंशपावनकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥ १ ॥
नानारत्नविचित्रभूषणकरी
हेमाम्बराडम्बरी,
मुक्ताहारविलम्बमान विलसत्
वक्षोजकुम्भान्तरी ।
काश्मीरागरुवासिता रुचिकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥२॥
योगानंदकरी रिपुक्षयकरी
धर्मार्थनिष्ठाकरी,
चन्द्रार्कानलभासमानलहरि
त्रैलोक्यरक्षाकरी ।
सर्वैश्वर्यसमस्तवांछितकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥ ३ ॥
कैलासाचलकंदरालयकरी
गौरी उमा शंकरी,
कौमारी निगमार्थगोचरकरी
ओंकारबीजाक्षरी ।
मोक्षद्वारकपाटपाटनकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥४॥
दृश्यादृश्य विभूतिवाहनकरी
ब्रह्माण्डभाण्डोदरी,
लीलानाटकसूत्रभेदनकरी
विज्ञानदीपाङ्कुरी ।
श्रीविश्वेशमनः प्रसादनकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥५॥
उर्वी सर्वजनेश्वरी जयकरी
माताकृपासागरी,
वेणीनीलसमानकुन्तलधरी
नित्यान्नदानेश्वरी ।
सर्वानंदकरी सदा शुभकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥६॥
आदिक्षान्तसमस्तवर्णनकरी
शम्भोस्त्रिभावाकरी,
काश्मीरा त्रिजलेश्वरी त्रिलहरि
नित्याङ्कुरा शर्वरी ।
कामाकाङ्क्षकरी जनोदयकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥७॥
देवी सर्वविचित्ररत्नरचिता
दाक्षायणी सुन्दरी,
वामे स्वादुपयोधरा प्रियकरी
सौभाग्य माहेश्वरी ।
भक्ताभीष्टकरी सदाशुभकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥८॥
चन्द्रार्कानलकोटिकोटिसदृशा
चन्द्रांशुबिम्बाधरी,
चन्द्रार्काग्निसमानकुण्डलधरी
चन्द्रार्कवर्णेश्वरी ।
मालापुस्तकपाशसाङ्कुशधरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥९॥
क्षत्रत्राणकरी महाऽभयकरी
माता कृपासागरी,
साक्षान्मोक्षकरी सदा शिवकरी
विश्वेश्वरी श्रीधरी ।
दक्षाक्रंदकरी निरामयकरी
काशीपुराधीश्वरी,
भिक्षां देहि कृपावलंबनकरी
माताऽन्नपूर्णेश्वरी ॥१०॥
अन्नपूर्णे सदापूर्णे
शंकरप्राणवल्लभे ।
ज्ञानवैराग्यसिद्ध्यर्थं भिक्षां
देहि च पार्वति ॥११॥
माता च पार्वती देवी
पिता देवो महेश्वरः ।
बान्धवाः शिवभक्ताश्च
स्वदेशो भुवनत्रयम् ॥१२॥
॥ इति श्रीशंकराचार्यविरचितं
अन्नपूर्णास्तोत्रं सम्पूर्णम् ॥
Page updated
Google Sites
Report abuse