Er det utopisk?
…
Er det utopisk
at folk vil hjelpe og stø kvarandre når dei vitterleg gjer det
og står saman enda solidariteten blir dømd ulovleg
at fleir og fleir vil knytte nevane slik at handflata
kan opne seg til tryggare handslag dei imellom
at angsten, også den metafysiske, bli borte
når folk nektar å tevle ut kvarandre
og ser at alle kan vera sikra arbeid og brød
om dei sjølve får rå
at folk som aldri så noko fornuftig i å sløse
i lengda heller ikkje vil tillata kapitalistane
å kaste maten på dynga og øydelegge ressursane
medan dei fleste på kloden svelt
at vi kan elske andre om lag som oss sjølve,
ikkje etter påbod, men fordi det er gjort mogleg
at sjøloppofring kan føre til siger utan tornekrone
når mange er med og gir kampen riktig retning
at dei mange som skaper verdiane
skal kunne overvinne dei få som har rana verdiane til seg
at fleirtalet skal kunne diktere eit fåtal
at bakmenn må fram i lyset
når det ikkje finst nokon å gøyme seg bak
Er det utopisk
at dei fleste vil bruke den fornuften
dei likevel må bruke dagleg
også til å velja den sida
som gjer at dei sjølve og deira barn
kan overleva
at det sjølsagde seier seg sjøl
—Arnljot Eggen (1923-2009)
…