Ballada és könyörgés

Ballade et oroison

Pere Noé, qui plantastes la vigne,

Vous aussi, Loth, qui beustes ou rochier,

Par tel party qu'Amours, qui gens engigne,

De voz filles si vous feist approuchier

(Pas ne le dy pour vous le reprouchier),

Archetriclin, qui bien sceustes cest art,

Tous trois vous pry qu'o vous vueillez perchier

L'ame du bon feu maistre Jehan Cotart.

Jadi extraict il fut de vostre ligne,

Luy qui beuvoit du meilleur et plus chier;

Et ne deust il avoir vaillant ung pigne,

Certes, sur tous, c'estoit ung bon archier;

On ne luy sceut pot des mains arrachier;

De bien boire ne fut oncques fetart.

Nobles seigneurs, ne souffrez empeschier

L'ame du bon feu maistre Jehan Cotart!

Comme homme beu qui chancelle et trepigne

L'ay veu souvent, quant il s'alloit couchier,

Et une fois il se feist une bigne,

Bien m'en souvient, a l'estal d'ung bouchier;

Brief, on n'eust sceu en ce monde serchier

Meilleur pyon, pour boire tost et tart.

Faictes entrer quant vous l'orrez huchier

L'ame du bon feu maistre Jehan Cotart!

Envoi

Prince, il n'neust sceu jusqu'a terre crachier;

Tousjours crioit: »Haro! la gorge m'art.«

Et si ne sceust oncq sa seuf estanchier,

L'ame du bon feu maistre Jehan Cotart.