Uran Neng Abac

URAN NENG ABAC

Neng Almario "amor" C. de Jesus

Ing ditac a patac

Ning uran neng abac,

Caretang tanaman, macabye ligaya

At detang Sampaga, meging sagiwa la

Ding bucu ning Rosa, memamucadcad na.

Tanaman a dutung

Mamutat la sana,

Ngeni laltu la ngan bulaclac nang bunga,

Itang Pinanari, ginulis king banwa

Anting paganaca, ketang pengacu na...

Ing Yatung liguran,

E na ne palbug pa;

Anya mibangun ca, saganan ing uran

Basan meng catawan, midayu'ng lisangan

At pacyalungan mo ring anac king dalan.

Manyaman ing patac

Ning Uran neng abac,

King galtung a gabung menga bitac bitac,

At ding Ortelano, tula da't sagacgac,

Cabang magpastul la, babo reng damulag.